• Era Val d’Aran receberà 124.000€ a trauès dera secretaria generau entah Rèpte Demografic der Estat entath finançament de projèctes innovadors entara transformacion territoriau e era luta contra eth despoblament, qu’a coma objectiu difoner era cultura dera innovacion e er emprenediment a trauès deth HUB d’innovacion HèPic

Eth Conselh Generau d’Aran a artenhut er ajut deth Ministèri entara Transicion Ecologica e eth Rèpte Demografic (MITECO) entath finançament de projèctes innovadors entara transformacion territoriau e era luta contra eth despoblament. Eth govèrn d’Aran presentèc aguesta sollicitud laguens dera linha de subvencions dera direccion generau de politiques contra era despoblacion depenenta d’aguest Ministèri.

A trauès d’aguest ajut, eth Ministèri dotarà ath govèrn d’Aran damb 124.000 € entà difóner era cultura dera innovacion e er emprenediment a trauès deth HUB d’innovacion rurau HèPic.

“De hè uns ans ençà, eth govèrn deth Conselh Generau d’Aran amie a tèrme ua apòsta fèrma pera innovacion e era digitalizacion en nòste territòri, damb er objectiu de generar projèctes transformadors que impulsen un modèl de desvolopament territoriau sostenible e reequilibrador des actuaus deficits demografics, de infraestructures e de servicis que patissen es territòris de montanha como era Val d’Aran” afirme era sindica d’Aran, Maria Vergés.

Aguesta subvencion a de servir, enes pròplèu dus ans, entà potenciar er emprenediment innovador en territòri e crear espacis de collaboracion que prebotjen aliances e impliquen as diferents actors dera Val d’Aran en tot generar atau un ecosistèma que faciliite er accès des joeni e es emprendedors ar ambit locau.