• Pendent era amassada qu’auec lòc ager entre eth Conselh Generau d’Aran e era Region Sanitària der Alt Pirineu i Aran, se reclamèc nauament ara Generalitat que dòte ath govèrn d’Aran des mieis de besonh entà qu’es proves PCR se poguen hèr en Espitau Val d’Aran, coma unica mesura entà guanhar temps e efectivitat ara ora de bracar es cadies de contagi

• Atau madeish, eth govèrn deth Conselh Generau exigic ara Generalitat que hèsque efectiu eth pagament dera compensacion ath personau sanitari aranés pr’amor deth COVID-19 e qu’ena rèsta de Catalunya s’a crubat en mes d’agost

Ager auec lòc era constitucion dera comission mixta de seguiment entre eth Conselh Generau d’Aran e eth departament de Salut dera Generalitat a trauès dera Region Sanitària der Alt Pirenèu e Aran, ua comission creada a peticion deth govèrn d’Aran entà agilizar es ahèrs relacionadi damb eth sistèma sanitari aranés que demoren arturadi de hè temps.

En aguesta prumèra amassada, era conselhèra d’Igualtat, Salut e Benèster, Maria Vergés, acompanhada des responsables deth Servici Aranés de Benèster e Salut, tornèc a reiterar eth besonh urgent de qu’era Generalitat de Catalunya balhe es mieis de besonh ath Conselh Generau entà qu’es pròves PCR se poguen realizar en Espitau Val d’Aran.

Segontes afirmaue era conselhèra, “realizar aguestes pròves en nòste espitau ei era forma mès eficaç de poder afrontar era tardor e er iuèrn damb cèrtes garanties de qu’eth virus non paralize tot eth territòri quan i age casi positius, pr’amor qu’era rapidesa d’actuacion e èster capables de talhar es cadies de transmission son, a dia d’aué, eth milhor esturment entà combàter aguesta situacion sanitària”.

D’un aute costat, se reclamèc tanben qu’eth personau sanitari dera Val d’Aran se veigue compensat damb eth pagament extraordinari damb motiu dera crisi sanitària provocada pera COVID-19 qu’era Generalitat de Catalonha autregèc as sanitaris catalans eth passat mes d’agost, mès que non a arribat ath personau aranés pr’amor que non s’a hèt efectiu eth traspàs d’aguesti recorsi ath Conselh Generau d’Aran.

“Auem reclamat ath Departament de Salut que hèsque dejà efectiu aguest pagament, d’un aute costat, ben mereishut pes nòsti professionaus, e qu’ena rèsta deth territòri SISCAT ja s’a pagat en mes d’agost”, declaraue era conselhèra.

Eth govèrn deth Conselh Generau d’Aran dejà s’a adreçat en fòrça ocasions ath departament de Salut ath long des darrèri ans, entà méter de manifèst era complèxa situacion dera sanitat aranesa, atau coma es rèptes e problematiques qu’a d’encarar, entre es quaus destaque era manca de finançament, que se manten en donades similars as de 2009, a despièch qu’an creishut es servicis que s’aufrissen, sustot dempús dera crisi sanitària.

“Se dejà patiem es conseqüéncies der infrafinançament abans dera COVID-19, a dia d’aué er estat dera sanitat aranesa ei encara mès delicat” explicaue Vergés, en tot híger que: “problèmes coma era manca de recorsi, d’espacis e de professionaus s’an vist incrementadi pr’amor dera pandèmia, pr’amor d’açò demanam ara Generalitat ua major predisposicion a escotar es besonhs d’Aran e eth sòn sistèma sanitari”.

En aguest sens, des deth govèrn deth Conselh s’a insistit ena importància qu’a trabalhar ena relacion bilaterau entre eth departament de Salut e eth pròpri Conselh Generau e s’a rebrembat ara Generalitat de Catalunya que, tot e auer es competéncies en matèria de sanitat traspassades, era volontat de collaboracion ei totau.

Eth sindic d’Aran, Francés Boya, afirmaue que “entath Conselh Generau d’Aran ei de vitau importància mantier ua relacion bilaterau damb era Generalitat de Catalunya. Atau madeish, ei urgent milhorar era situacion deth sistèma sanitari aranés, qu’enquiath moment e damb era crisi COVID-19 s’a demostrat qu’ei un modèu propèr e efectiu e ei era volentat deth govèrn aranés qu’atau seguisque estant”.

Pendent era amassada se tractèren tanben ahèrs relacionadi damb salut publica coma era gestion sanitària deth COVID o era relacion damb eth Servici d’Emergéncies Mediques (SEM). En aguest sens, era conselhèra Vergés arregraïc era predisposicion dera Region Sanitària der Alt Pirenèu e Aran a trabalhar ena melhora dera sanitat aranesa.