• Eth plen dera maxima institucion aranesa a aprovat aué per unanimitat ua declaracion institucionau qu’inste reconéisher eth sòn encaish juridic e administratiu singular entà deishar d’èster tractat, ena practica, coma ua administracion locau, impedint eth pròpri exercici d’autogovèrn, çò que contraditz er Estatut d’Autonomia de Catalunya era Lei de Regim Especiau d’Aran e met en seriós risc era sua capacitat tà atier es besonhs dera ciutadania aranesa.

Ena session extraordinària deth Plen deth Conselh Generau d’Aran celebrada aué, ena Casa deth Senhor d’Arròs, s’a aprovat per unanimitat era demana deth compliment d’aquerò qu’afirmen autant er Estatut d’Autonomia de Catalunya e era Lei d’Aran que definissen claraments autant era capacitat d’autogovèrn dera maxima institucion aranesa coma era sua regulacion juridica e administrativa, en tot diferenciar-se dera administracion locau, pr’amor que desvolope, entre d’auti, àmbits competenciaus autonomics coma era sanitat.

Era declaracion, aprovada per unanimitat damb es vòts favorables des grups d’Unitat d’Aran e Convergéncia Aranesa, eth Conselh Generau d’Aran inste autant as govèrns de Catalunya e der Estat espanhòl, coma as crambes deth Parlament de Catalunya e deth Congrès des Deputats, qu’accèpten e respècten era singularitat d’Aran e contribuïsquen a hèr-la efectiva enes encastres juridics e administratius.

Entara sindica d’Aran, Maria Vergés a manifestat que: “Era grana valor deth Conselh Generau d’Aran ei èster ua administracion singulara e propèra ara ciutadania, quauquarren que resulte ua garantia entà aufrir seguretat e estabilitat ara societat aranesa entà poder atier es sòns besonhs” en tot híger que “eth govèrn d’Aran trabalhe entpa qu’aguesta singularitat age un encaish efectiu a nivèu juridic e administratiu que permete ath Conselh Generau d’Aran desvolopar era sua autonomia politica e, per tant, èster ath costat des persones”.

Vielha, 20 de deseme 2024