• Era sindica d’Aran a manifestat aguest maitin, pendent prumèra amassada dera Taula Territoriau dera candidatura des JJOO d’iuèrn 2030, qu’ei de besonh qu’era Generalitat de Catalunya respècte era autonomia d’Aran, deuant der anonci qu’era Generalitat de Catalunya d’amiar a tèrme ua consulta vinculanta sus es JJOO d’iuèrn enes territòris deth Pirenèu, e que sigue eth Conselh Generau d’Aran qui gestione e definisque es tèrmes enes qu’aguesta consulta s’a d’amiar a tèrme ena Val d’Aran.

• Eth Conselh Generau d’Aran demane exercir eth sòn dret a promòir consultes populares atau coma reconeish era Lei de Regim Especiau d’Aran en sòn article

Era conselhèra de Presidéncia dera Generalitat, Laura Vilagrà, ven d’anonciar en ua ròda de premsa, atau e coma a informat pendent era prumèra amassada dera Taula Territoriau des JJOO, qu’er executiu catalan amiarà a tèrme pendent aguesta primauera ua consulta vinculanta enes comarques deth Pirenèu catalan entà conéisher eth posicionament des sòns ciutadans deuant era possibilitat d’acuélher es Jòcs Olimpics d’Iuèrn de 2030, tot e que, coma a explicat, encara non ei definida era pregunta que se plantejarà.

Deuant aguest anonci, era sindica d’Aran a manifestat pendent aguesta trobada que: “ei era intencion deth Conselh Generau d’Aran reclamar eth respècte ara autonomia dera maxima institucion aranesa pr’amor que, atau e coma era Lei d’Aran establís, en sòn article 13.4, eth Conselh Generau d’Aran a dret a promòir consultes populares en matèries dera sua competéncia e, per tant, reclamam qu’ena Val d’Aran aguesta consulta sigue definida e gestionada peth Conselh Generau d’Aran”.

Aguest maitin, diuèrsi mieis de comunicacion an publicat es resultats dera Analisi prospectiva des JJOO d’Iuèrn, ua enquèsta amiada a tèrme per part dera Generalitat de Catalunya e sus era qu’eth Conselh Generau d’Aran non auie auut constància ne previ avís per part deth govèrn catalan, enquiath moment dera sua presentacion ena amassada dera Taula Territoriau.

En aguest sens, era sindica d’Aran a volut destacar que: “coma institucion activa e comprometuda damb era candidatura olimpica des Pirenèus tàs Jòcs de 2030, eth govèrn d’Aran torne a demanar èster tengut en compde entà arténher era hita d’aguesta candidatura olimpica” e per çò que hè as resultats dera enquèsta era sindica a manifestat era sua satisfaccion pes resultats dera madeisha, que constaten que tres de cada quate persones consultades son a favor d’aguesti JJOO. Atau madeish, era sindica d’Aran higie que “deth Conselh Generau d’Aran ençà, a despièch de non auer estat informadi sus aguesta enquèsta, mos congratulam d’aguesti resultats que demòstren que, atau e coma ven defenent era maxima institucion deth prumèr moment ençà, aguesta candidatura ei ua grana oportunitat entath territòri e atau ac enten era ciutadania” e higie que “deuant d’aguesti resultats, pòt èster qu’ua consulta pèrde tot eth sentit”.

Cau rebrembar que, en seteme de 2021, eth Conselh Generau d’Aran siguec era prumèra institucion en aprovar en sòn plen, per unanimitat, ua declaracion institucionau a favor dera candidatura. Declaracion que hèc extensiua a toti es ajuntaments e institucions deth Pirenèu catalan e aragonés e ara que s’i an adscrit lèu ua setantia d’administracions, entre eres toti es consistòris e EMD aranesi.

Ath delà, eth Conselh Generau d’Aran organizèc eth passat mes de noveme un acte que condèc damb era participacion des presidéncies des deputacions de Huesca, Zaragoza, Barcelona e Girona, es presidéncies des comarques Ribagorza, Alto Gállego, Jacetania e Sobrarbe e Conselhs Comarcaus dera Alta Ribagorça, Pallars Jussà e Pallars Sobirà, Alt Urgell e Cerdanya, a on eth president deth Comitat Olimpic Espanhòl (COE), Alejandro Blanco, aufric era conferéncia “Er olimpisme coma motor de desvolopament territoriau”.