• Per miei d’un nau convèni damb ADDA e era societat mercantila Gureak en Aran, eth govèrn d’Aran impulse era atencion de persones damb discapacitat emplegades en centre especiau de trabalh dera Val d’Aran gestionat per aguesta societat, en tot amiar a tèrme era contractacion d’un professionau tath seguiment e acompanhament psicosociau des usatgèrs/es e tath foment dera inclusion sociolaborau

Eth govèrn deth Conselh Generau d’Aran a signat un nau convèni de collaboracion damb era Associacion de Discapacitats d’Aran (ADDA) e era societat mercantila Gureak Aran entara atencion de persones damb discapacitat emplegades en centre especiau de trabalh de Gureak.

Per miei d’aguest convèni, eth govèrn d’Aran a aumentat en 30.000 € era dotacion economica que balhe a ADDA entà refortir eth supòrt professionau d’ADDA a Gureak per miei dera contractacion d’ua professionau que dejà amie a tèrme un seguiment psicosociau en centre de trabalh de Gureak en Aran.

“Un des objectius deth govèrn deth Conselh Generau d’Aran ei eth de barrar eth cercle dera gestion e atencion as persones a trauès deth nòste sistèma sociau e sanitari. En aguest sens, era atencion ara discapacitat per part dera maxima institucion a demorat endarrèr pendent ans, e ara volem possar un projècte clar e concrèt que balhe solucions as besonhs reaus deth nòste territòri dera man des sòns professionaus” afirmaue era sindica d’Aran, Maria Vergés, en tot híger que: “en aguest sens, eth trabalh que desvolopen era associacion ADDA e eth centre de trabalh de Gureak ei primordiau entath benèster collectiu dera societat aranesa”.

Era societat mercantila Gureak Aran genère e gestione oportunitats laboraus estables e adaptades as persones damb discapacitat en nòste territòri, en tot fomentar era inclusion sociolaborau. Pera sua part, ADDA da responsa as besonhs des persones damb discapacitat intellectuau en edat laborau dera Val d’Aran que, pes sues caracteristiques non pòden accedir a auer un contracte de trabalh en un Centre Especiau de Trabalh.