• En marc deth Plan d’Accion tara Atencion dera Salut Mentau e es Addicions qu’eth govèrn d’Aran comencèc a implementar eth passat mes de junhsèga e que hè especiau incís enes accions de prevencion des addiccions e deth suicidi, era promocion dera salut mentau perinatau e dera salut emocionau, a trauès d’accions dirigides ara poblacion damb major situacion de vulnerabilitat

• Damb er objectiu de reforçar era atencion de proximitat des persones que, en quinsevolh etapa dera sua vida, patissen bèra problematica relacionada damb era salut mentau, es Servicis Assistenciaus Integrats d’Aran an ampliat eth sòn equip de salut mentau

En marc deth sòn Plan d’Accion tara Atencion dera Salut Mentau e es Addicions ena Val d’Aran, eth Conselh Generau d’Aran a reforçat er equip de professionaus d’atencion ara salut mentau de Servicis Assistenciaus Integrats damb ua infiermièra, ua trebalhadora sociau e un terapèuta ocupacionau.

“Aguest Plan hè incís enes accions de prevencion des addiccions e deth suicidi, e era promocion dera salut mentau perinatau e dera salut emocionau”, explicaue era sindica d’Aran, Maria Vergés, en tot híger que: “prebotjaram activitats dirigides ara poblacion damb major situacion de vulnerabilitat en relacion ara manca de salut mentau e es addiccions, coma persones joenes, hemnes en etapa perinatal, hemnes damb situacion de violéncia masclista, persones damb ua situacion sociau e economica fòrça desfavorable, enfància e gent grana”.

Era ampliacion d’aguest equip de proximitat facilitarà era atencion des persones qu’an dificultat entà accedir as centres de salut mentau o qu’an de besonh ua atencion mès intensiva perque se trapen en ua situacion de crisi. Atau madeish. gràcies a compdar damb aguest equip, s’eviten desplaçaments dehòra deth territòri.

Aguesti professionaus se somen ar equip dejà existent de diuèrsi facultatius de psiquiatria entà adults e entara poblacion ifanto-juvenila, e entà supervision deth programa de mantenement damb metadona, atau coma de psicologia autant d’adults coma infantil.

En aguest sens, era sindica d’Aran a manifestat que “era volontat deth govèrn d’Aran seguís estant era de consolidar eth nòste sistèma sanitari e sociau e arténher eth maxim de servicis possibles que melhoren era qualitat de vida dera ciutadania d’Aran. E, per çò que hè ara salut mentau, aguest ère un des rèptes a arténher”.