Eth Conselh Generau d’Aran refòrce es ajudes d’urgéncia sociau en matèria de loguèrs e suministres pr’amor dera crisi deth COVID-19

Laguens des mesures d’urgéncia sociau qu’eth govèrn deth Conselh Generau d’Aran a metut en foncionament, ua des mès destacades ei eth refòrç des ajudes de loguèr e suministres tà familhes en situacion de vulnerabilitat e qu’enes darrères setmanes an patit un aument considerable dera demana

Pr’amor der impacte economic e laborau qu’a provocat era crisi sanitària deth COVID-19, eth govèrn deth Conselh Generau d’Aran a decidit reforçar es ajudes d’urgéncia sociau que balhe, entot ajustar es requisits d’accès entà facilitar eth pagament deth loguèr der abitatge abituau ad aqueres familhes que se trapen en situacion de vulnerabilitat economica e sociau.

Atau donc, es persones interessades auràn de contactar damb er airau de Servicis Sociaus deth Conselh Generau d’Aran (Telf: 973642560/ ubasp@aransalut.com) a on les informaran des detalhs entà demanar era ajuda.

Aguesta sollicitud, que se poderà descargar ena sedença electronica deth Conselh Generau d’Aran, o ben se poderà ramplir fisicament, damb cita prèvia, ena sedença administrativa des Servicis Sociaus plaçada en Cap dera Vila de Vielha, inclodís ua declaracion responsabla deth sollicitant ena qué se responsabilize de que totes es donades que balhe siguen cèrtes. Aguesta declaracion se signe pr’amor que, damb eth decrèt der estat d’alarma, s’an suspenut es tramits administratius e, ei probable, qu’es persones sollicitants non agen accès peth moment a determinada documentracion acreditativa dera sua situacion.

Enquiath moment, er airau de servicis sociaus deth Conselh Generau d’Aran ja a atengut diuèrses sollicituds d’ajuda entath pagament deth loguèr relacionades damb era crisi provocada peth coronavirus, mès tanben de solicituds d’aliments e suministres.

Aguesta ampliacion des ajudes sociaus se mantierà enquia passat un mes deth lheuament der estat d’alarma decretat peth govèrn der Estat. Passat aguest temps, eth govèrn deth Conselh amassa damb es professionaus sociaus, tornarà a revisar e a adaptar, s’ei de besonh, era norma en foncion dera situacion sociau generada.