Vielha, 17 de junh de 2016.- Eth Conselh Generau d’Aran a hèt publica era licitacion deth projècte de reforma e ampliament deth refugi dera Artiga de Lin.

Eth Govèrn d’Aran destinarà ara reforma un pressupòst de 262.000 èuros, e ei previst qu’es òbres se realizen aguest ostiu. Aguesta reforma e ampliament deth refugi, permeterà reconvertir aguest equipament que ei part deth hilat de refugis que possedís e gestione eth Conselh Generau d’Aran, en tot melhorar era sua accessibilitat e foncionalitat que permete en sòn cas era sua explotacion en regim de concession e era sua rendabilitat. Damb er ampliament eth refugi passarà a auer capacitat entà 25 persones. Ua des melhores destacables d’aguesta accion de reforma, ei qu’era cobèrta incorporarà sistèmes de captacion d’energia solara fotovoltaïca.

Era reforma e ampliament deth refugi dera Artiga de Lin, ei restacada damb eth projècte de potenciacion d’aguest lòc unic ena Val d’Aran e entà potenciar ath madeish temps era rota aranesa der Aneto, qu’eth Govèrn d’Aran ja a hèt d’autes accions, coma ei era installacion est an passat d’un cable d’acièr pera part deth Còth de Hòro, en tot melhorar es camins tradicionaus deth pas entà Benasque, coma son eth madeish camin de Còth de Hòro e eth deth Pòrt dera Picada.

Auta des accions que se desvoloparà aguest ostiu serà eth plan pilòt sus era regulacion dera circulacion damb veïculs ena Artiga de Lin. Per aguest motiu des deth 22 de junhsèga e enquiath 11 de seteme, er accès pes Uelhs deth Joeu e pera Artiga de Lin, serà damb un servici de transpòrt qu’abilitarà eth Conselh Generau d’Aran e qu’anarà des deth parcatge dera Ermita enquiath Pla dera Artiga de Lin, o damb es veïculs autorizadi. Er objectiu d’aguesta mesura ei qu’es clients que visiten aguest espaci tan emblematic dera Val d’Aran poguen gaudí’c ena sua totalitat. Tanben se plaçarà un punt d’informacion en aguesta madeisha zòna.

Foto: Lleidatur.com