• Aué s’a realizat era prumèra repoblacion de 4 exemplars de craba pirenaica.
• En ua dusau fasa, se tornaràn a liberar naui exemplars de craba pirenaica capturades en sòn estat sauvatge.
Es crabes pirenaiques en moment dera sua reintroduccion enes montanhes dera Val d’Aran.
Er an 2013, eth Conselh Generau d’Aran hec ua reünion damb es presidents des Associacions Ramadères e damb es Societats de Caça de Pesca deth país.
En aguesta prumèra amassada se tractèc sus eth projècte de retornar enes montanhes araneses era HERC, nòm ancian dera craba pirenaica (actuauments coneishuda coma craba ispanica).
Es darrèri exemplars deth “bocardo” des Pirenèus moriren en Ordesa, donques era subespècia de bocardo aué dia existent ei era craba pirenaica. Aguesta espècia auie poblat enes montanhes deth massís deth Pirenèu abans qu’er isard.
Er an 2014, er Estat espanhòu arribèc a un acòrd damb er Estat francés entà facilitar exemplars de craba pirenaica que sigueren repobladi ena vessant francesa dera Ariège.
Eth conselhèr Jose E. Arró damb es forestaus en tot campar es crabes pirenaiques.
A compdar d’aguesta repoblacion en Pirenèu francés, eth Conselh Generau d’Aran mantenguec ua naua amassada eth passat dia 13 d’aguest mes d’octobre damb es representants des Associacions Ramadères e es Societats de Caça e Pesca deth país entà préner er acòrd de hèr ua prumèra repoblacion de 4 exemplars de craba pirenaica (1 boc e 3 crabes).
Era tecnica d’Agricultura, Ramaderia e Medi Naturau deth Conselh Generau d’Aran, Judit Jaquet, damb era veterinaria.
Prèviaments aguesti exemplars an estat en quarantena entà per’mor d’auer era seguretat que sanitàriament se tròben en bon estat e non son portadores de cap malautia. Aguest ère eth requisit imposat per totes es parts prealables ara repoblacion: evitar quinsevolh afectacion sus era sanitat animau.
En ua dusau fasa, se tornaràn a liberar naui exemplars de craba pirenaica capturades en sòn estat sauvatge e que prèviaments tanben auràn de superar era pròva deth sòn estat sanitari.
Eth conselhèr d’Agricultura, Ramaderia e Miei Naturau d’Aran, Jose E. Arró, damb eth tecnic de Medi Naturau, Ivan Afonso, en moment de liberar es crabes pirenaiques ena montanha.
Eth conselhèr d’Agricultura, Ramaderia e Miei Naturau d’Aran, Jose E. Arró, a manifestat “aguesta repoblacion non compòrte cap limitacion ne restriccion ena practica dera caça enAran, çò que se pretén ei qu’era craba pirenaica s’adapte ath sòn entorn naturau en tot convíuer damb totes es activitats qu’en aguest moment se desvolòpen”.
Arró a hijut “s’era sua adaptacion ei positiva e se reprodusís damb normalitat, en un futur passarà a èster espècia cinegetica e era sua caça serà regulada atau coma actuauments se hè damb es autes espècies de caça major”.