Vielha, 6 de juriòl de 2018.- Eth Conselh Generau d’Aran a renauit era suscripcion damb eth setmanari digitau “Eth tricicle”, laguens deth projècte educatiu entàs escòles dera Val d’Aran.

Aguest projècte que neishec hè dus ans per iniciatiua dera comunitat educativa des escòles dera Val d’Aran e deth departament de Cultura e Politica Lingüistica deth madeish Conselh Generau d’Aran, consistís ena traduccion ar aranés d’ua revista setmanari en format digitau nomenada “Eth tricicle”, entà trabalhar notícies d’actualitat damb es alumnes des escòles de Les, Bossòst, Vielha e ZER Val d’Aran. Era traduccion deth setmanari deth catalan ara lengua aranesa cor a cargue deth departament de Cultura e Politica Lingüistica deth Conselh Generau d’Aran.

“Eth tricicle” ei un estrument principauments escolar entà apropar a mainatges e mainades de 6 a 12 ans a compréner eth mon que les entornege e era sua complexitat a trauès d’ua recopilacion setmanau de notícies adaptades as desparièrs nivèus e competéncies.

Eth sindic d’Aran Carlos Barrera, expliquèc que damb aguest renauiment “eth Govèrn d’Aran reafirme eth sòn supòrt as iniciatiues que sorgissen dera comunitat educativa dera Val d’Aran e toti es projèctes entà melhorar er accès des mainatges e mainades araneses ara nòsta lengua e cultura, atau coma er aument der emplec sociau der aranés en quinsevolh àmbit que sigue, e ena escòla en particulara”.

Eth Conselh Generau d’Aran destine 2.340€ ad aguest projècte educatiu des escòles dera Val d’Aran.