• Era conselhèra de Coneishement deth Conselh Generau d’Aran a signat aguest maitin aguesti convènis damb es direccions des centres educatius de primària e segondària dera Val d’Aran e damb es Associacions de Familhes d’Alumnes des escòles de Salardú, Arties e Gessa, damb er objectiu de balhar un supòrt economic en aguesti airaus as familhes e collaborar damb eth sector educatiu deth territòri

Era conselhèra de Coneishement, Angelina Cases, s’a amassat aguest maitin damb es direccions des centres educatius de primària e segondària dera Val d’Aran, atau coma damb es Associacions de Familhes d’Alumnes (AFA) des Escòles Ruda de Salardú, Loseron d’Arties e Sant Martin de Gessa entà signar es convènis de collaboracion entath finançament des transpòrts extraesclars e entath finançament deth minjador escolar deth cors 2021-2022, respectivament.

“Maugrat qu’eth Conselh Generau d’Aran non compde damb competéncies en airau der ensenhament, ei era nòsta volontat aufrir era nòsta ajuda e collaboracion permanenta ath sector educatiu dera Val d’Aran, un sector qu’entenem coma un pilar fonamentau dera nòsta societat”, afirmaue era conselhèra Cases, en tot híger que: “a trauès deth renauiment d’aguesti convènis volem dar responsa as besonhs des familhes e der escolanat des nòsti centres educatius e balhar-les un supòrt economic entà que poguen contunhar gaudint des servicis de minjador e transpòrt extraescolar”.

D’un costat, damb eth convèni de collaboracion entath finançament des transpòrts extraescolars d’aguest cors, eth Conselh Generau dòte d’ua partida totau de 30.000 euròs despartidi as diferents centres escolars de primària e segondària. Era maxima institucion aranesa avalore es gessudes coma recors educatiu que permet as alumnes un aprendissatge iniciat en aula en tot proporcionar naues estrategies e contenguts ath sòn procès educatiu.

D’un aute costat, eth convèni entath finançament deth minjador escolar entath cors 2021-2022 a coma principau objècte d’afavorir era existéncia des petites escòles en toti es municipis dera Val d’Aran, en aguest cas, enes pòbles de Salardú, Gessa e Arties, e compde damb ua dotacion totau de 13.00 euròs despartidi entre es AFA d’aguesti centres.