Vielha, 04 de març de 2016.- Eth Conselh Generau d’Aran, a renauit eth contracte damb era enterpresa Quavitae Servicios Asistenciales deth Grop MAPFRE, entà contunhar en tot prestar eth servici de teleassisténcia domiciliària as persones granes o que patissen quauque tipe de discapacitacion dera Val d’Aran. Eth renauiment deth contracte a vigéncia des deth dia 1 de març de 2016 enquiath 28 de hereuèr de 2017.

Aguest servici, qu’actuauments assisitis a usatgèrs des desparièrs municipis dera Val d’Aran, ei de vitau importància entath collectiu de persones granes que per desparièrs motius viu soleta, o entà persones damb discapacitacion, que li permet demanar ajuda en cas d’urgéncia, des dera pròpria abitança.
Eth servici aufrís atencion telefonica permanenta, mejançant era installacion d’ua equipa informatica ena abitança particulara de cadua des persones pendent es 24 ores deth dia, es 365 dies der an.

Eth sistèma ei constituït per un boton qu’era persona amie damb era permanentaments laguens dera abitança e un sistèma de mans liures que permet era comunicacion des de quin lòc que sigue dera casa damb ua centrau, que se gestione des d’era, era telefonada en foncion deth motiu qu’era provòque.

Era conselhèra de Salut e Benestar, Anna Díaz, soslinhèc que “eth Conselh Generau d’Aran contunhe en tot priorizar es accions de caractèr sociau, entà dar era melhor qualitat assistenciau possibla as persones granes o damb dificultats, que per d’auta part son es quaus viuen en mès risc”.