• Eth govèrn deth Conselh Generau d’Aran invertirà eth 50% deth còst d’aguesti trabalhs de mantenement enes sendèrs e pistes forestaus deth Naut Aran, mentre qu’eth consistòri municipau aportarà er aute 50%

• En çò que hè ara rèsta de municipis aranesi, cau rebrembar qu’ei eth Conselh Generau d’Aran qui assumís integralament aguestes actuacions

Eth Conselh Generau d’Aran renauirà eth convèni de collaboracion damb er Ajuntament de Naut Aran entath finançament deth mantenement e milhora des camins, sendèrs e pistes forestaus deth municipi.

“Mantier es nòsti camins e pistes ben condicionadi e nets ei primordiau entath  govèrn deth Conselh Generau”, afirme eth conselhèr de Territòri, Paisatge e Gestion Ambientau, Francés Bruna, que hig que: “damb aguest convèni, establim un mecanisme de collaboracion damb er Ajuntament de Naut Aran que mos ajude a suenhar er entorn naturau deth municipi entà que vesins e visitants poguen gaudir-lo pendent tot er an”.

En marc d’aguest convèni, eth Conselh Generau invertirà ath torn de 45.000 euròs en aguesti trabalhs, mentre qu’er Ajuntament aportarà era madeisha quantitat entà assumir de forma conjunta es actuacions de besonh.

Cau rebrembar, qu’en çò que hè ara rèsta de municipis aranesi, aguest servici de mantenement e condicionament ei assumit integralament peth Conselh Generau d’Aran.