• Aguest acòrd a coma objectiu per un costat ajudar en trabalh qu’era AECC a trauès dera sua Junta Provinciau en Lleida e era locau ena Val d’Aran amien a tèrme en matèria de sensibilizacion, prevencion, difusion e tractament dera malautia e, per aute, balhar supòrt ena organizacion des colònies entà mainadèra damb càncer de tot er Estat qu’era Associacion ven impulsant de hè 24 ans en Aran.

Aguest maitin, era sindica d’Aran, Maria Vergés, e eth president dera Junta Provinciau de Lleida dera AECC, Francesc Maranges, an signat er acòrd de collaboracion entre eth Conselh Generau d’Aran e era Associacion Espanhòla Contra eth Càncer peth quau era maxima institucion aranesa collabòre damb 6.000€ annaus damb aguesta entitat tant destacada non sonque en Aran se non en tot eth territòri espanhòl.

Eth Conselh Generau d’Aran e era AECC hè dejà ans que collabòren en prètzhèt d’afavorir es campanhes e actuacions qu’aguesta entitat amie a tèrme en territòri d’Aran a trauès d’aguest acòrd, qu’enguan s’a vist incrementat des 3000€ enquiàs 6000€. Ua des accions mès destacades ei era organizacion des colònies entà mainadèra damb càncer. Aguestes colònies son orientades a melhorar era qualitat de vida e pensades entà afavorir era sua expression emocionau e milhorar era sua autoestima e independéncia. Compden damb ua amplia varietat d’activitats d’òci relacionades damb eth entorn e era natura com era ipica, eth rafting o era acampada en un refugi de montanha, entre moltes autes.

Entara sindica d’Aran: “Aguesta collaboracion ven dejà de luenh e reflèxe tanben eth compromís deth govèrn aranés entà balhar supòrt a totes aqueres entitats que trabalhen entà melhorar era vida des persones, sustot d’aqueres que mès patíssen”.

Es colònies d’enguan compden damb un totau de 88 mainatges e mainades d’entre 7 a 17 ans de tot er Estat.

Vielha, 16 de junhsèga de 2024