Vielha, 22 de hereuèr de 2018.- Eth Conselh Generau d’Aran dempús dera prepausa realizada per Archiu Generau d’Aran restaurarà eth Libre de capítols de Gessa (1.759 a 1.841).

Ena Val d’Aran eth capítol ère eth reglament o nòrma emanada deth conselh locau e non condicionada a cap auta institucion.

Eth libre se compause d’ua seria d’articles que li da eth nòm. Era nòrma se dictaue peth plen deth conselh, ei a díder era amassada de toti es proprietaris de casa, congregadi, generauments, a tòc de campana. Es acòrds èren arremassadi en un volum, nomenat Libre dera vila o Libre de capítols. Eth sòn contengut ère diuèrs, non solaments trobam es capítols mès que tanben conten es acòrds sus arrendaments des bòsqui, eth contracte deth apotecari, deth mètge o deth mèstre o es concòrdies damb es viles vesies.

Er estat actuau deth Libre de Gessa presente diuèrses patologies (lordèra, pèrta de supòrt, talhs, huelhes desgatjades), que maumeten eth sòn estat de conservacion e dificulten era sua manipulacion.

Eth Conselh Generau d’Aran a encargat es trabalhs de restauracion ath talhèr Estudio B2 SL de Barcelona, que restaure era documentacion depausada en Archiu Generau d’Aran des der an 2000. Es trabalhs consistiràn en desmontatge deth libre, neteja mecanica e desinfeccion, neteja semiumida, desacidificacion, reaprèst, consolidacion deth supòrt, aplanat, cosut e enquadernacion.

Es trabalhs de restauracion deth Libre de capítols de Gessa an un còst de 4.198 €