• Eth govèrn d’Aran se prepause restaurar, en fases successiues, era totalitat des pintures d’aguest monument deth sègle XVII, que narre era Passion e Resurreccion de Crist e qu’encara aué en dia s’installe en autar major dera glèisa de Bossòst cada Dijaus Sant, en tot seguir ua antica tradicion

Eth Conselh Generau d’Aran a restaurat diuèrses pintures deth monument qu’eth Dijaus Sant, en tot seguir ua antica tradicion, s’installe en autar major dera glèisa dera Mair de Diu dera Purificacion de Bossòst. Maugrat qu’ena Val d’Aran se consèrven d’auti monuments de Setmana Santa, eth de Bossòst ei er unic qu’encara aué en dia se monte.

Se tracte d’un monument deth sègle XVII, composat de dotze scènes pintades ath tremp en tèles de lin sus bastidors de husta. Se desconeish era autoria des pintures, que narren era Passion e Resurreccion de Crist.

En aguesta prumèra fasa s’an restaurat eth quadre deth Sant Sopar e era grana representacion deth Diu Pair, qu’aucupe eth plafon superior dera cramba deth monument.  Enes propèrs dies es pintures restaurades retornaran tara Val d’Aran.

Era intervencion, que s’a amiat a tèrme enes installacions deth Centre de Restauració de Béns Mobles de Catalunya (CRBMC) en Valldoreix (Barcelona), pera empresa especializada TdArt Heritage Curators S.L.U., a auut un còst de 7.435,45€, e a compdat tamb ua subvencion de 2.370€ deth Departament de Cultura dera Generalitat de Catalunya.

Eth Conselh Generau se prepause restaurar, en fases successiues, era totalitat des pintures deth monument e tanben, en collaboracion tamb era parròquia e er Ajuntament de Bossòst, mielhorar-ne es condicions de magazematge coma garantia entara sua conservacion.