• Eth Conselh Generau d’Aran, damb era collaboracion dera Generalitat de Catalunya, encarguèc era restauracion d’aguesta escultura ath Centre de Restauració de Béns Mobles de Catalunya, a on s’a retirat era capa de pentura modèrna qu’amagaue es caracteristiques qu’atribuïssen aguesta òbra ath talhèr de Comenge

Eth Conselh Generau d’Aran, damb era autorizacion deth bisbat d’Urgell e dera parròquia d’Arties, amièc a tèrme era passada tardor era restauracion dera imatge gotica de Sant Jaime d’Arties.

Se tracte d’ua escultura talhada en husta de noguèr que represente ath Sant dret e descauç, vestit damb ua tunica longa e ua capa per dessús. Pòrte barba, mostacha e un chapèu d’ala ampla e ten ena man quèrra un libre, mentre que damb eth braç dret ten un baston de factura modèrna. Eth dòrs dera escultura ei uet.

Pr’amor des sues caracteristiques tipologiques e estilistiques, s’a atribuït era escultura ath talhèr de Comenge, a despièch qu’ua espessa capa de repintat modèrn n’emmascaraue es caracteristiques.

Era intervencion, qu’a consistit principaument ena retirada deth repintat modèrn, a descorbit grana part dera policromia originau, especiaument eth peu daurat e es uelhs clars pròpis des imatges deth talhèr de Comenge, en tot méter de manifèst era nauta qualitat deth trabalh escultoric. Tanben s’a assolidat e balhat proteccion ad aguesta policromia; s’a melhorat era presentacion deth braç dret e s’a estabilizat era basa dera estatua.

Era actuacion, qu’a auut un còst totau de 5.989 euròs a compdat tamb ua subvencion de 2.277 euròs per part dera Generalitat de Catalunya, s’a amiat a tèrme enes installacions deth Centre de Restauració de Béns Mobles de Catalunya.

Era imatge tornarà lèu tath sòn plaçament, d’abitud ena glèisa de Santa Maria d’Arties.