• Aguest movement, integrat per persones, organizacions e institucions deth mon rurau de Catalunya, a coma objectiu préner part activa des decisions qu’afecten ad aguestes zònes, combáter eth desequilibri territoriau e eth despoblament e trabalhar peth desvolopament sostenible des territòris ruraus

Eth Plen deth Conselh Generau d’Aran, en session ordinaria, aprobèc ager, damb es vòts a favor d’UA e era abstencion de CA, era adesion deth govèrn aranés ara associacion deth Movenment País Rurau, ua associacion qu’a coma objectius dar votz e representacion a persones, entitats, municipis o institucions implantades o relacionades damb er ambit rurau de Catalunya, defensar, melhorar e potenciar es activitats ruraus, dar supòrt ad aguesti territòris e protegir e preservar eth miei naturau, entre d’auti.

En aguest sens, era sindica d’Aran afirmaue que “deth Conselh Generau d’Aran ençà èm comprometudi damb es iniciatives que luten per arténher un mon rurau melhor, damb mès oportunitats e que cerquen un futur sostenible e innovador”.

Entà arténher es sòns objectius, País Rurau elaborarà prepauses, normatives e legislatives, as administracions competents, realizarà activitats de desvolopament deth mon rurau, e tanben de supòrt, organizacion e execucion front a actuacions publiques o privades que poguen afectar ar ambit rurau, amiarà a tèrme tanben campanhes de divulgacion e accions formatives, divulgatives, sociaus e culturaus.