• Aguesta iniciativa de micromecenatge preve ajudar a finançar sies projèctes damb retorn sociau enes territòris deth Naut Pirenèu e Aran, en tot complementar damb hons publics es aportacions dera ciutadania a trauès dera plataforma goteo.org

Per tresau an consecutiu, eth Conselh Generau d’Aran se hig ara convocatòria de finançament collectiu de projèctes damb retorn sociau ath territòri, Matchfunding “Arrela’t” Naut Pirenèu e Aran, qu’a coma objectiu contribuïr a méter en practica naues formules entà reactivar el teishit socioeconomic deth Naut Pirenèu e Aran.

En aguesta accion de micromecenatge, es administracions complèten damb un hons public de 24.000€ es aportacions qu’era ciutadania hè a trauès dera plataforma de goteo.org. Ei previst repartir un minim de 48.000€ entre un maxim de sies projèctes que seràn escuelhudi per un jurat independent, en foncion des bases previstes.

Aguesta tresau convocatòria conjunta des sies comarques deth Naut Pirenèu e Aran seguirà era linha des dues anteriores, que sigueren tot un succès. Se tracte d’un procès que compde damb diuèrses etapes e qu’acabarà damb era campanha de finançament collectiu.

Prumèr, entà hèr a conéisher aguesta convocatòria, e tà informar e resòlver es dobtes de besonh, se daurirà un formulari entà qu’es persones damb projèctes interessadi poguen demanar recéber mès informacion sus eth procès:

https://ja.cat/minteressaelMATCHFUNDING

Dempús, se haràn es sessions informatives e començaràn es acompanhaments entara preparacion des projèctes tà tot eth territòri deth Naut Pirenèu e Aran. En aguest periòde, mejançant eth supòrt d’agents, s’acompanharà ena preparacion dera candidatura des sòns projèctes.

A compdar de mejans de mai, e ath long de tot un mes, se daurirà eth concors a on es iniciatives pirenenques poderàn presentar eth sòn projècte definitiu entà qu’un jurat avalore e trigue es sies idèes guanhadores. Se prevé seleccionar un projècte per comarca en tot tier en compde eth sòn impacte en territòri en tèrmes sociaus, de sostenibilitat, equilibri territoriau, d’enfortiment democratic, d’innovacion e retorn sociau.

Entà acabar, es projèctes escuelhudi receberàn ua formacion e acompanhament intensiu per part dera Fondacion Goteo entà dessenhar es respectives campanhes de comunicacion e micromecenatge. Se demore qu’aguest assessorament les permete arténher er objectiu de finançament minim (aumens uns 4.000€).

Aguesta iniciativa ei promoguda peth Conselh Generau d’Aran e es Conselhs Comarcaus dera Alta Ribagorça, Alt Urgell, Cerdanya, Pallars Jussà e Pallars Sobirà, es Oficines de Joenessa d’aguesti territòris, es servicis de promocion economica e trabalh d’aguestes institucions, er Institut entath Desvolopament e era Promocion deth Naut Pirenèu e Aran (IDAPA),  eth Consòrci GAL Alt Urgell – Cerdanya, eth Consòrci Leader Pirenèu Occidentau e er Ateneu Cooperatiu deth Naut Pirenèu e Aran damb eth supòrt dera DG de Joenessa, era Deputacion de Lleida e era de Girona.