• Eth Conselh Generau d’Aran, conselhs comarcaus e ajuntaments pirenencs, consensueren ager un manifèst a on solliciten ath govèrn catalan qu’age en compde ath mon locau entara presa de decisions que afecten as territòris ruraus, atau coma establir mesures especifiques que s’adapten ara singularitat e especificitat deth Naut Pirenèu e Aran

Era sindica d’Aran, Maria Vergés, e eth conselhèr d’Economia, Torisme e Promocion Economia, Josep Canut, participèren ager ena amassada telematica  damb es alcaldes e presidents des conselhs comarcaus dera Cerdanya, Alt Urgell, Pallars Jussà, Pallars Sobirà e Alta Ribagorça, entà consensuar un manifèst conjunt en tot reclamar ara Generalitat de Catalunya qu’age en compde era singulartitat d’aguesti territòris ara ora d’aplicar mesures restrictives que les afècten, pr’amor qu’es mesures adoptades enquiara non s’adapten ara sua realitat.

“Èm conscients dera delicada situacion sanitària ena que mos trapam en aguesti moments mès reclamam que se mos age en compde ara ora de préner decisions que mos afècten de manèra dirècta”, declaraue era sindica d’Aran, en tot híger que: “era Generalitat de Catalunya pren decisions unilateraus en clau metropolitana, sense contemplar qu’aguestes madeishes mesures non sonque non se comprenen en mon rurau, senon que afècten fòrça negatiuament ena sua realitat socioeconomica”.

En aguest sens, era sindica afirmaue que: “eth confinament municipau en un territòri coma era Val d’Aran o quinsevolh aute territòri deth Pirenèu ei ua mesura ineficaç e que que non contemple era realitat des municipis petits que non compden damb es servicis basics, tanpòc son eficaci es oraris establidi entara restauracion, ne s’a contemplat en cap moment es devastadors efèctes socioeconomics qu’auut entàs territòris transfronterèrs eth barrament perimetrau de Catalunya”.

Eth manifèst deth mon locau deth Pirenèu e Aran sorgit dempús dera amassada d’ager, expause eth clar compromís d’aguesti territòris ena luta contra era COVID-19 mès reclame ath govèrn catalan era descentralizacion dera presa de decisions e que s’age en compde era realitat rurau ara ora de préner naues mesures.

Pera sua part, eth conselhèr Canut afirmaue que: “aguest manifèst sollicite tanben qu’es restriccions vagen acompanhades damb mesures de reactivacion economica e se demane tanben ua linha d’ajudes especifiques entath Pirenèu e Aran, pr’amor que pendent era tempsada d’iuèrn vedem fòrça afectada era nòsta economia”.