• Eth govèrn d’Aran a aumentat en 2.000 euròs aguest convèni, dotat ara d’un totau de 12.000 euròs annaus qu’anaràn destinadi ath programa d’ajudes sociaus de Càritas en nòste territòri

Era passada setmana, era sindica d’Aran, Maria Vergés signèc damb Càritas Val d’Aran eth renauiment deth convèni de collaboracion d’aguesta entitat damb eth Conselh Generau d’Aran, qu’enguan s’a ampliat en 2.000 euròs.

“Damb aguest convèni, eth Conselh Generau d’Aran balhe un supòrt economic de 12.000 euròs annaus ath programa d’ajudes sociaus de Càritas ena Val d’Aran” afirmaue era sindica d’Aran, en tot híger que: “en contèxte actuau, damb era crisi sociau e economica qu’a provocat era pandemia e qu’a afectat a fòrça peprsones, ei era nòsta volentat refortilhar era responsa e ajuda deuant dera emergéncia sociau e, per aguest motiu, auem amiat a tèrme un increment en aguesta dotacion, pr’amor qu’era labor sociau de Càritas ei fòrça important entath nòste territòri”.

Càritas Val d’Aran amie a tèrme un trabalh sociau imprescindible en tot ajudar as persones en risc d’exclusion sociau, en coordinacion damb es Servicis Sociaus deth Conselh Generau d’Aran. Tanben coordinen e collabòren enes activitats d’informacion e sensibilizacion en ahèrs relacionadi damb era hemna, dan supòrt e complementen era cobertura de besonhs basics, ajuden a melhorar era qualitat de vida des collectius mès desfavoridi e sajen d’evitar, ena mesura que sigue posible, qu’es persones mès vulnerables arriben a situacions de besonh e marginacion.