• Eth desplegament dera tecnologia satellitau permeterà disposar de cobertura de qualitat en entorns actuaument isoladi ena Val d’Aran

• Aguest acòrd establís tanben er impuls de solucions centrades en airaus coma era gestion des emergéncies e risqui naturaus, eth torisme o eth contròl dera fauna, entre d’auti

Mobile World Capital Barcelona (MWCapital), Hispasat, Conselh Generau d’Aran e Arantec, damb era collaboracion deth Departament dera Vicepresidéncia e de Politiques Digitaus e Territòri dera Generalitat, an presentat aguest maitin en MWC Barcelona 2022 un acòrd de collaboracion entath desplegament de tecnologia satellitau en zònes remòtes de nauta montanha e, ath madeish temps, eth desvolopament de projèctes pilòt de connectivitat intelligenta aplicables as particularitats deth territòri e es sòns besonhs.

Ara presentacion an assistit Carlos Grau, CEO de MWCapital, Jordi Hereu, president de Hispasat, era sindica d’Aran, Maria Vergés, e Eisharc Jaquet, CEO d’Arantec. Tanben a compdat damb era preséncia deth secretari de Politiques Digitaus dera Generalitat de Catalunya, David Ferrer, qui a destacat que “aguesta collaboracion entà dar cobertura satellitau en zònes de nauta montanha ei pleament alinhada damb era estrategia digitau deth govèrn dera Generalitat entà auer un país connectat e vertebrat, generador d’igualtat d’oportunitats entà tota era ciutadania de Catalunya aquiu a on viuen”. “Es infraestructures digitaus mos an de perméter transformar Catalunya en un país de progrès e oportunitats a on era innovacion digitau sigue eth motor dera nòsta economia”, a hijut.

Er acòrd artenhut establís eth desplegament d’ua solucion integrau de connectivitat via satellit de banda ampla e Internet des Causes en un entorn de nauta montanha, concretament en refugi dera Artiga de Lin, ua zòna actuaument sense cobertura. Jordi Hereu, president de Hispasat, a declarat que “aguest pilòt ei ua oportunitat de gran interès entà demostrar coma gràcies ara connectivitat universau deth satellit se pòt accelerar eth desvolopament digitau de zònes remòtes ena Val d’Aran, dinamizar es sòns principaus activitats productives e melhorar era eficiéncia e era precision des sòns servicis d’emergéncies”.

En marc der acòrd se desplegaran solucions en airaus coma era salut, era cobertura era cobertura d’emergéncies e seguretat, era gestion des risqui naturaus o activitats toristiques. Se tracte de servicis basics que se ven afectadi pera escasa cobertura en zònes remòtes de quauqui airaus dera Val d’Aran. Comdar damb un hilat de comunicacion satellitau permeterà garantir ua cobertura de qualitat en aguesti entorns.

Carlos Grau, CEO de MWCapital, a declarat que “aguest acòrd ei de gran valor entà MWCapital. Portam dètz ans trabalhant entà melhorar era vida des persones a trauès dera tecnologia e aguest acòrd n’ei un gran exemple. Era tecnologia satellitau contribuirà a garantir servicis basics, a dinamizar er ecosistèma economic e a redusir era brèca digitau enes zònes ruraus e remòtes, aporant solucions que melhoraran es oportunitats d’un territòri tan valuós coma era Val d’Aran”.

Era sindica d’Aran, Maria Vergés, a assegurat que “deth Conselh Generau d’Aran ençà èm comprometudi damb era apòsta pera innovacion e era retencion deth talent joen, quauquarren que prebotjam a trauès deth nòste HUB d’innovacion rurau HèPic, per aguest motiu, celebram poder amiar a tèrme aguest projècte, que vedem coma ua grana oportunitat entath nòste territòri e qu’aurà aplicacion en sectors clau coma son era ramaderia, era gestion des emergéncies o era atencion as persones, entre d’autes”.

En concrèt, pendent aguest projècte pilòt s’estudiaràn casi d’emplec especiaument enfocadi ara gestion des emergéncies ena montanha, gràcies ath desplegament de boishòrles de connectivitat en refugis de nauta montanha, ar emplec dera sensorica entara prevencion de queigudes e a veïculs d’emergéncies damb connectivitat satellitau en movement entara monitorizacion d’accidents. Ath delà, se trabalharà ena melhora des activitatstoristiques (mejançant sensorizacion IoT de ciclistes e senderistes, contròl d’aforament e accèssi a parcatges o eth desplegament de punts WiFi satellitaus) e eth contròl dera ramaderia, era fauna salvatge e er entorn naturau per miei de sensorizacion des animaus e era monitorizacion de lauegi e d’auti fenomens naturaus.

Per part sua, Arantec serà era companhia que s’encuedarà d’aportar eth sòn know-how en dessenh, desplegament e metuda en marcha de hilats de sensors inalambrics en ubicacions ostiles damb condicions meteorologiques adverses, baisha cobertura de donades e abséncia d’energia. Atau madeish, aportarà era sua plataforma IoT Smarty Planet entara gestion des donades e coma Sistèma d’Altèrta deuant perilhs d’origina meteorologica.