• Aguest ei eth prumèr viatge qu’eth Conselh Generau d’Aran collabòre damb er Ajuntament de Vielha e Mijaran en manteniment d’aguest equipament esportiu. A trauès d’aguest convèni, era maxima institucion aranesa dotarà ath consistòri damb 100.000 euròs annaus entà collaborar damb eth finançament des servicis que prèste aguesta infraestructura.

Era sindica d’Aran, Maria Vergés, e er alcalde de Vielha e Mijaran, Juan Antonio Serrano, an signat aguest maitin eth convèni de collaboracion entre eth Conselh Generau d’Aran e er Ajuntament de Vielha e Mijaran entath finançament deth manteniment deth Palai de Gèu.

“Aguest ei eth prumèr viatge qu’eth Conselh Generau d’Aran collabòre damb er Ajuntament de Vielha e Mijaran en manteniment d’aguest equipament e ac hèm pr’amor qu’èm convençudi dera importancia qu’a eth Palai de Gèu de Vielha entath conjunt dera poblacion dera Val d’Aran”, explicaue era sindica d’Aran, “per miei d’aguest convèni, eth govèrn d’Aran aportarà ar Ajuntament de Vielha e Mijaran ua dotacion de 100.000 euròs annaus entà ajudar ath consistòri a finançar es servicis que prèste aguesta infraestructura”.

Er alcalde de Vielha e Mijaran, Juan Antonio Serrano, a arregraït “eth compromís e collaboracion deth Conselh Generau d’Aran damb aguest equipament, qu’ei un des recintes esportius mès destacables de tota era Val d’Aran e qu’aufrís servici a toti es abitants deth país” e asseguraue que “aguest convèni de collaboracion mos ajudarà a hèr front as despenes ocasionades pes reiterades problematiques qu’afècten ad aguesta infraestructura”.