• Era Fabrica dera lan ei integrada laguens deth hilat de musèus.
• S’a substituït eth solèr de husta per pèira entà redusir umitats.
Pendent tot aguest mes de hereuèr, eth Departament de Cultura deth Conselh Generau d’Aran, per miei dera empresa Servicis Ambientaus dera Val d’Aran (SAVA, S.L.) a cambiat eth solèr dera Fabrica dera lan.
En paraules deth sindic d’Aran, Carlos Barrera, “aguesta substitucion de solèr, husta per pèira, s’a realizat entà per’mor de redusir es contunhes patologies provocades pera umitat, era quau creaue fongs ath torn des elements de husta”.
S’a metut un solèr de pèira de forma irregulara sus drenants entà per’mor de melhorar era ventilacion en tot redusir era umitat.
En an 1999, eth Conselh Generau dera Val d’Aran aquerís ua fabrica de lan plaçada en Cap dera Vila de Vielha. Er objectiu ère recuperar ua petita industria qu’ans entà darrèr auie format part dera vida vidanta des aranesi. Hèt que cau enquadrar en ua politica de documentacion e restauracion der auviatge istoric industriau d’Aran.
Integrada en hilat de musèus, era Fabrica dera lan mos introdusís enes prumèri moments dera industrializacion en Aran. Un periòde istoric que, a despièch dera sua pòga incidéncia en país, cau auer-lo en consideracion. En prumèr lòc pr’amor qu’era bastida dera fabrica representèc entara comunautat aranesa un pas entara modernizacion e un aleujament des ahèrs domètges, tostemp pesucs, des hemnes dera val. E en dusau lòc, pr’amor qu’ei er inici d’un cambi sociau e economic qu’arribarie ans mès tard tamb es espleites mineres e es centraus idroelectriques.
Era plan shuenhada restauracion que s’a hèt d’aguest espaci mos permet enguardar era fabrica en estat blos, totes es sues maishines poirien tornar a foncionar aué madeish. Un guida especializat acompanhe ath visitaire ath long de tot eth recorrut e aguest pòt seguir tot eth procès de fabricacion que s’amiaue a tèrme ena fabrica, ei a díder, era transformacion dera lan vèrge en madèishes. Dus audivisuaus, a on se pòden veir es maishines en foncionament, complementen era visita.
Vielha, 4 de març de 2016
Conselh Generau d’Aran: Núria Sanjuan