• Aguest maitin a auut lòc era amassada dera Ponéncia Mixta de Traspassi entre Conselh e Generalitat entà iniciar es trabalhs deth nau modèl de finançament qu’aurie d’entrar en vigor en 2024 dempús de qu’acabe era vigéncia der actuau.

• Era sindica d’Aran s’a amassat aguest maitin en Barcelona damb eth secretari de Govèrns locaus e Relacions damb Aran dera Generalitat entà hèr eth seguiment des diuèrsi traspassi qu’encara non an estat assomidi de forma efectiva e revisar aqueres competéncies traspassades qu’an de besonh ua melhora.

• En aguesta amassada, era sindica d’Aran a insistit en besonh qu’eth nau acòrd de finançament assegure era capacitat d’autogovèrn e d’autonomia dera maxima institucion aranesa e la dòte des recorsi de besonh entà poder arténher eth desvolopament efectiu d’aguest autogovèrn.

Aguest maitin a auut lòc, en Barcelona, era amassada dera Ponéncia permanent en matèria de traspassi e convènis entre eth Conselh Generau d’Aran e era Generalitat de Catalunya, presidida pera sindica d’Aran, Maria Vergés, e eth secretari de Govèrns locaus e Relacions damb Aran, David Rodríguez.

Pendent aguesta amassada, era sindica d’Aran a remercat “eth besonh de començar a trabalhar en nau acòrd de finançament deth Conselh Generau d’Aran, pr’amor qu’er actuau convèni finalize enguan e, tot e es discrepàncies, aguest acòrd a suposat un auanç important entat Conselh Generau” e senhalaue que: “ei indispensable qu’eth nau acòrd assegure era capacitat d’autogovèrn dera maxima institucion aranesa”. Un besonh que dejà trasladèc ara conselhèra d’Economia e Isenda dera Generalitat, Natàlia Mas, pendent era sua visita tara Val d’Aran a principis de mes.

En aguest sens, era sindica d’Aran mantén que: “ei essenciau qu’era maxima institucion aranesa compde damb un acòrd de finançament que consolide era nòsta capacitat d’autogovèrn entà poder arténher eth desvolopament efectiu d’aguesta autonomia” e higie que: “ei de besonh compdar damb es recorsi entà poder aplicar ues politiques que meten as persones en centre, entà poder gestionar es sòns besonhs dera proximitat ençà”.

Era Ponéncia permanent de traspassi, constituïda ena Comission Bilaterau deth Conselh Generau d’Aran e era Generalitat de Catalunya de 2021, a coma objectiu principau er impuls e era preparacion de prepauses de traspassi que s’agen d’elevar ath Plen dera Comission, atau coma er estudi de prepauses de convènis e d’auti esturments de collaboracion entre andues institucions qu’afecten ara gestion des servicis non traspassadi.

“Aguest ei un òrgan de vitau importància entath desplegament dera Lei de Regim Especiau d’Aran e des competéncies qu’encara non an estat assomides de forma efectiva peth Conselh”, afirme Vergés.