• Pendent eth plen ordinari deth Conselh Generau d’Aran celebrat aguest maitin, era sindica d’Aran a anonciat qu’enes pròplèu setmanes se publicaràn es bases d’ua linha d’ajudes destinades ath sector empresariau aranés, fòrça afectat pes restriccions pendent aguest darrèr an, entà finançar eth 50% deth rebut de lordères de 2020

En plen ordinari deth Conselh Generau d’Aran celebrat aué, era sindica d’Aran, Maria Vergés, a anonciat qu’eth govèrn aranés trabalhe de hè temps ena creacion d’ua linha d’ajudes destinades ath sector empresariau del territori, fòrça afectat pes restriccions aplicades der inici dera pandèmia ençà.

“Eth govèrn deth Conselh Generau d’Aran dejà hè uns mesi que trabalhe en cercar mesures que balhen supòrt ara ostalaria, restauracion, comèrç e d’autes empreses deth territòri, que s’an vist fòrça afectades pera crisi socioeconomica provocada pera COVID-19”, explicaue era sindica d’Aran, en tot híger que: “laguens des nòstes limitacions e possibilitats, auem decidit destinar ua partida entà subvencionar eth 50% deth rebut de lordères abonat peth nòste teishut empresariau en 2020”.

Es bases d’aguesti ajuts se publicaràn enes pròplèu setmanes e se haràn publiques entà que poguen demanar-les es persones qu’ac agen de besonh.

Entre  d’auti ahèrs, pendent aguest plen s’a aprovat defenitivament dejà era declaracion e catalogacion coma Ben Culturau d’Interès Locau dera glèisa parroquiau de Sant Pèir, eth cementèri parroquiau, era capèla de Sant Ròc, eth cementèri civiu de Teresa e era Capèla de Santa Anna de Bausen, autant coma des bens mòbles associadi.