• Eth govèrn d’Aran a iniciat es trabalhs tara naua licitacion d’aguest servici, pr’amor qu’er actuau contracte finalize en gèr de 2024, e iniciarà ua campanha d’informacion, conscienciacion e participacion ciutadana entà definir-lo

• Damb aguesti trabalhs eth govèrn d’Aran preten arténher un modèl adaptat ara realitat e besonhs actuaus, a trauès deth quau se poguen complir es objectius mercadi pera UE e era Agéncia Catalana de Residus e que tengue en compde era demografia d’Aran e es pics de poblacion pendent es sasons toristiques

Eth Conselh Generau d’Aran trabalhe de hè un temps ençà en un nau modèl de servici de remassada de residus que melhore es deficits der actuau e s’adapte as besonhs reaus deth territòri.

“En gèr de 2015 s’aprovèc era externalizacion per contracte deth servici, que s’alongue enquia gèr de 2024” explicaue eth conselhèr de Territòri, Paisatge e Gestion Ambientau, Oriol Sala, en tot híger que: “eth modèl de servici actuau ei dimensionat  segontes es donades de generacion de residus de hè lèu dètz ans, ues donades actuaument desfassades, era tipologia de residus d’alavetz ei fòrça aluenhada des besonhs qu’a dia d’aué auem entà complir damb es objectius mercadi pera UE e era Agéncia Catalana de Residus e, ath delà, eth contracte de 2015 non ten en compde es pics de poblacion pendent es sasons toristiques, çò qu’a comportat pendent ans acumulacions en dates de fòrça afloéncia”.

En tot preveir era finalizacion d’aguest contracte en gèr de 2024, eth govèrn deth Conselh Generau d’Aran dejà comencèc hè un temps a estudiar possibles opcions e premanir-se entara licitacion deth servici er an que ven.

En aguest sens, era sindica d’Aran explicaue que: “en tot tractar-se d’un servici essenciau iniciam ua campanha d’informacion, conscienciacion e participacion ciutadana entà explicar es donades reaus e definir quin ei eth modèl de residus que volem en Aran” e higie que: “volem arténher un modèl de servici de remassada de residus foncionau, que melhore era imatge deth nòste territòri e, sustot, que mos ajude a melhorar es donades de generacion de residus, entà auançar a un futur mès verd e sostenible”.

Ath long des pròplèu dies, eth Conselh Generau d’Aran iniciarà aguesta campanha a trauès d’infografies e informacions sus era generacion de residus deth territòri e sus er actuau modèl deth servici. Un còp balhada tota era informacion, se procedirà a iniciar un procès de participacion ciutadana entà poder premanir era licitacion deth servici er an que ven.

Cau rebrembar qu’era remassada de residus ei ua competéncia municipau que siguec delegada ara maxima institucion per part des ajuntaments aranesi ans endarrèr.