• Era sindica d’Aran e es responsables d’Aran Salut e eth SABS s’amassèren damb representants de Cat Salut entà tractar sus eth desplegament dera cartèra de servicis en matèria de sanitat deth govèrn aranés e era possibilitat d’establir un convèni pluriannau entà finançar aguesti servicis, en tot melhorar atau era atencion as usatgèrs e usatgères deth nòste sistèma de salut e estauviar-les, per exemple, auer de desplaçar-se dehòra deth territòri entà accedir a determinadi servicis

Eth passat diuendres, 9 de junh, era sindica d’Aran, Maria Vergés, amassa damb era directora deth Servici Aranés de Benèster e Salut (SABS), Maria Àngels Borràs, eth director gerent d’Aran Salut, Jordi Vilana, e era rèsta der equip directiu d’Aran Salut, recebec ath director assistenciau deth Servici Catalan dera Salut, Ignasi Carrasco, eth gerent dera Region Sanitària deth Naut Pirenèu e Aran, Miquel Abrantes, e d’auti nauti representants autant dera region coma des servicis centraus de Cat Salut, damb qui mantengueren ua amassada de trabalh entà tractar sus eth desplegament dera cartèra de servicis en matèria de sanitat deth govèrn aranés.

“En marc des competéncies en matèria de salut qu’eth govèrn deth Conselh Generau d’Aran assumic en 2001, trabalham en ua planificacion a quate ans de coma desplegar es servicis que mos manquen entà completar era cartèra de servicis d’Aran en aguesta matèria” afirmaue era sindica d’Aran, en tot híger que: “entath govèrn d’Aran ei priotari aufrir era melhor atencion possible as persones usatgères deth nòste sistèma de salut e benèster, en tot evitar-les desplaçaments dehòra deth territòri entà accedir a uns determinadi servicis sanitaris, per exemple”.

En aguest sens, s’estúdie era possibilitat de que mètges especialistes de quauqui des servicis qu’Aran non balhe actuaument, poguen visitar eth nòste territòri regularment entà cobrir aguesti besonhs.

Atau madeish, pendent era amassada de trabalh mantenguda era passada setmana, s’abordèc tanben ua modificacion dera forma de finançament deth sistèma sanitari a trauès d’un convèni pluriannau damb Cat Salut entà poder finançar aguest desplegament dera cartèra de servicis.