• Er airau sociau deth Conselh Generau a autrejat ajudes destinades a mès de 40 mainatges e mainades per valor de mès de 12.000 euròs entà qu’es menors qu’ac auien de besonh podessen participar aguest ostiu enes casaus e colònies, ua chifra fòrça superior as d’abans dera pandèmia

Pendent aguest ostiu, er airau sociau deth Conselh Generau d’Aran a autrejat ajudes entà finançar era participacion en casaus d’ostiu a 44 mainatges e mainades deth territòri, en tot destinar ua partida de 12.650 euròs. Ua chifra fòrça superior as des ans prèvis ara pandèmia: en an 2019 se concediren 13 ajudes per valor de 4.000 euròs, en 2018 se’n concediren 16 per valor de 3.220 e en 2017 s’autregèren ajudes a 12 enfants per valor de 1.079 euròs.

“Era crisi sanitària a desencadeat tanben ua crisi socioeconomica damb un naut impacte en Aran, pr’amor d’açò, eth govèrn deth Conselh Generau d’Aran determinèc dejà er an passat aumentar sustanciaument es recorsi destinadi as ajudes sociaus qu’era maxima institucion aranesa balhe ad aqueres persones que se trapen en situacion de vulnerabilitat en Aran”, explicaue era sindica d’Aran, Maria Vergés, en tot híger que: “en aguest sens, deth govèrn d’Aran ençà èm comprometudi damb era atencion ara enfància e, per aguest motiu, ère indispensable entà nosati balhar supòrt economic ad aqueres familhes qu’ac an de besonh entà qu’es mainatges e mainades poguen participar enes casaus d’ostiu”.

En aguest sens, era sindica d’Aran a volut arregreïr “eth trabalh amiat a tèrme e era collaboracion de toti es casaus d’ostiu dera Val d’Aran damb eth Conselh Generau entà que cap mainatge ne mainada se quedèsse sense participar en aguestes activitats d’ostiu per motius socioeconomics”.

Pendent 2020, eth Conselh Generau d’Aran destinèc 35.000 euròs en un totau de 242 ajudes entàs menors en situacion de risc, ues ajudes qu’englòben es bèques entàs casaus d’ostiu, bèques d’escolarizacion, entà libres e escòles mairaus.