• Pendent eth Plen deth Conselh Generau d’Aran celebrat aguest maitin, s’a metut de manifèst per part deth govèrn aranés es diuèrses gestions amiades a tèrme autant damb era Generalitat de Catalunya coma damb representants deth govèrn francés per çò que hè ara mobilitat transfronterèra

Eth govèrn deth Conselh Generau d’Aran a amiat a tèrme diuèrses gestions damb representants der Estat francés e era Generalitat de Catalunya entà conéisher er estat des restriccions de mobilitat damb era frontèra francesa e hèr-les arribar er impacte qu’aguestes limitacions an sus era economia de territòris coma era Val d’Aran, especiaument en Baish Aran.

“Èm conscients dera grèu afectacion qu’an entara economia dera Val d’Aran, especiaument enes parçans deth Baish Aran, es actuaus limitacions provocades, per un costat, peth barrament perimetrau de Catalunya e, per un aute, peth confinament domiciliari en que se trapen es ciutadans francesi”, afirmaue eth conselhèr Francés Boya, en tot híger que: “des deth govèrn deth Conselh Generau d’Aran mos auem metut en contacte damb representants der Estat francés e era Generalitat de Catalunya entà trasladar-les era preocupacion des territòris que, coma eth nòste, depenen des relacions trasnfronterères”.

Cau rebrembar qu’era termièra damb França ei dubèrta, mès eth confinament domiciliari en vigor en estat francés e eth barrament perimetrau de Catalunya non permeten era mobilitat abituau. En aguest sens, eth conselhèr Amador Marqués afirme que: “auem hèt arribar era nòsta inquietud deuant aguesta situacion tanben a d’autes administracions, coma era Deputacion de Lleida, a on coma deputat e demanat qu’eth govèrn catalan armonize eth lheuament des confinaments perimetraus damb eth dera mobilitat des ciutadans francesi”.

Pera sua part, era sindica d’Aran, Maria Vergés, a volut reiterar eth supòrt deth govèrn d’Aran ath teishit empresariau aranés, ath temps qu’a destacat “eth besonh de respectar es mesures establides pes autoritats sanitàries e èster responsables entà arténher baishar eth risc de rebròt en territòri e poder arténher eth tresau tram deth Plan de dubertura dera Generalitat eth dia 21 de deseme, damb eth quau se lheuarie eth barrament perimetrau de Catalunya”.

En çò que tanh ath desconfinament de França, encara non s’an hèt publiques es mesures oficiaus ne era data exacta deth desconfinament.