• En Plen deth Conselh Generau d’Aran celebrat aué, s’a aprovat era modificacion de credit que permeterà ath govèrn aranés destinar 250.000 euròs deth sòn romanent de tresaureria entara crompa d’un aparelh de radiografies e un aute d’anestesiologia entar Espitau Val d’Aran

• Aguesti aparelhs demorauen en obsolescéncia de hè temps e ja non ère possible era sua reparacion per çò qu’eth govèrn deth Conselh Generau d’Aran a priorizat aguesta inversion

Eth govèrn aranés invertirà 250.000 euròs deth sòn romanent de tresaureria entar aquesiment d’un nau telemando e un nau aparelh d’anestesiologia tar Espitau Val d’Aran, dempús d’auer aprobat ua modificacion de crèdit ad aguest efècte.

“Grana part des mashines deth nòste espitau se trapen en situacion d’obsolescéncia tecnologica pr’amor dera manca d’inversion pendent es darrèri ans” afirmaue era conselhèra d’Igualtat, Salut e Benèster, Maria Vergés e higie que “e eth govèrn aranés a priorizat aguesta despena tot e er esfòrç economic que supause, entà assegurar era qualitat assistenciau que balham atau coma entà potenciar era activitat sanitària mès enlà deth COVID-19”.

En aguest sens, cau rebrembar qu’aguest ostiu, eth govèrn deth Conselh Generau d’Aran s’artenhec un acòrd damb era Deputacion de Lleida entà un ajut de 320.000 euròs entath renauiment deth TAC e d’ua incobadora de transpòrt, tanben en estat d’obsolescéncia, que se materializarà abantes de finaus d’an.

“Des deth govèrn deth Conselh Generau volem qu’er Espitau Val d’Aran compde damb uns equipaments medicaus renauidi que permeten as sòns professionaus hèr front as besonhs e es rèptes que plantege era sanitat aranesa, a despièch der infrafinançament que patim e que dejà auem denonciat deuant era Comission d’Ahèrs Institucionaus deth Parlament de Catalunya”, a manifestat eth sindic d’Aran, Francés Boya, e a hijut “damb aguestes inversions, en an 2020 s’aurà destinat mès de miei milion d’euròs en melhores en aguest espitau”.