• Era maxima institucion aranesa, a trauès de Pompièrs Emergéncies, a iniciat es tramits de besonh entà poder donar ua ambulància 4×4 de Supòrt Vitau Basic, que se trapaue actuauments en desús, ara Associacion d’Ucranians d’Aran entà proporcionar assisténcia medicau contunhada as victimes dera guèrra en Ucrania

En tot dar responsa a ua demana dera Associacion des Ucrainians dera Val d’Aran, eth Conselh Generau d’Aran a iniciat es tramits administratius entà poder donar ua ambulància 4×4 de Supòrt Vitau Basic (USVB) de Pompièrs-Emergéncies entà proporcionar assisténcia medicau contunhada as victimes dera guèrra en Ucraïna.
Aguest veïcul des Pompièrs d’Aran se trapaue actuaument en desús e s’autrejarà damb er equipament basic e materiau medicau fungible entà que pogue èster emplegat deth moment dera entrega estant.

“Coma maxima institucion aranesa volem hèr tot çò que sigue ena nòsta man entà sajar d’amendrir eth dolor e patiment de tanti milèrs de persones victimes der orror e era injustícia” asseguraue era sindica d’Aran.

En aguest sens, eth mes de març der an passat, gràcies ara campanha gestionada a trauès des Pompièrs d’Aran ena que participèren ath torn d’ua setantia de persones volontàries, se remasseren 30 palets d’aliments, productes d’igièna personau e d’auti productes de prumèr besonh; 100 m3 de ròba d’abric, mantes, sacs de dromir, ròba de lhèt e tovalhòles, e lèu 3.800 unitats de medicaments, materiau sanitari e infantil donat peth Conselh Generau a trauès d’Aran Salut, que se hèren arribar enta Ucrania a traués deth Consolat deth país en Barcelona.

Vielha, 23 de hereuèr de 2023