Vielha, 11 de gèr de 2019.- Eth Conselh Generau d’Aran e es ajuntaments de Les, Bossòst, Naut Aran e Vielha e Mijaran an establit mejançant un convèni era creacion deth servici de tecnica compartida de Joenessa damb er objectiu de regular era relacion entre eth Conselh Generau e es ajuntaments entà desvolopar es Plans Locaus de Joenessa.

Era tecnica compartida de Joenessa desvolòpe prètzhèts de supòrt municipau, assessorament e formacion en politiques de joenessa; realizacion e impuls entath desplegament deth PLJ deth municipi; dessenh des metodologies e estructures de besonh entà amiar a tèrme es accions previstes e actuacions enes municipis.

Aguestes accions responen ath besonh de potenciar eth desvolopament de politiques de joenessa des municipis e era creacion de servicis municipaus especifics adreçadi ara poblacion juvenila; apropar des des municipis es servicis municipaus adreçadi as joeni e hèr-les protagonistes tant coma sigue possible; dinamizar accions, naues e ja existentes en matèria de joenessa enes municipis; e potenciar qu’es ajuntaments profiten es servicis que s’aufrissen des dera Oficina de Joenessa dera Val d’Aran deth Conselh Generau d’Aran e des dera Direccion Generau de Joenessa.

Es accions de dinamizacion desvolopada enes municipis son entre d’autes:

– Amassades de coordinacion, dessenh, programacion e avaloracion.

– Amassades damb grops organizadi e associacions entara organizacion d’activitats populars.

– Amassades damb joeni entà trabalhar, programar e organizar es ahèrs qu’an a veir damb era sua vida en municipi e es sòns espacis d’interlocución.

– Talhèrs diuèrsi de caractèr culturau, esportiu e d’òci a trauès dera transmission de valors.

– Assisténcia as amassades de coordinacion damb d’auti tecnicians, professionaus, entitats e/o institucions e responsables politics.

– Realizacion de prètzhèts d’informacion juvenila des airaus qu’interèssen as joeni (salut, abitatge, educacion, trabalh e foment dera participacion).