Era repoblacion de cavilats s’a realizat enes trams der arriu mès afectadi pes aiguats deth 2013

Er arriu Garona a enes sues aigues eth cavilat, ua espècia endèmica que demore tant eth territòri espanhòu coma francés, e qu’ei catalogada coma “en perilh d’extincion”. Dempús des aiguats der an 2013, era poblacion de cavilat se vedec fòrça afectada.

Damb er objectiu de contribuïr ara conservacion dera ictiofauna deth Garona, eth Conselh Generau d’Aran metèc en marcha eth projècte “Estat de conservacion deth cavilat (Cottus hispaniolensis) en arriu Garona” damb eth supòrt deth Ministerio de Agricultura, Alimentación y Medio Ambiente, mejançant dera Fundación Biodiversidad e en marc deth programa d’ajudes entara realizacion d’activitats en encastre dera biodiversitat terrèstre, marina e litorau, eth cambi climatic e era qualitat ambientau. Aguest projècte s’a desvolopat pendent eth 2014 e es objectius an estat diagnosticar er estat de conservacion actuau deth cavilat, desvolopar mesures de gestion entà recuperar es sues poblacions, e establir canaus entara difusion sociau des valors dera diuersitat ictica d’aguest arriu.

Dempús de diferenti estudis realizadi, era baisha o inclús nulla poblacion d’aguesti exemplars hège a perilhar era sua espècia, atau, eth Conselh Generau d’Aran e Endesa, laguens d’aguestes accions de conservacion dera Biodiversitat, a liberat uns 200 cavilats en Garona.

En paraules deth conselhèr d’Agricultura, Ramaderia e Miei Naturau d’Aran, Jose E. Arró “er objectiu d’aguesta accion ei repoblar eth Garona d’aguesta espècia en perilh d’extincion que se vedec fòrça redusida arraïtz des aiguats deth 2013” Arró a hijut “es accions de repoblacion de cavilats s’a realizat enes trams der arriu mès afectadi pes aiguats.”