• Era sindica d’Aran e er alcalde de Bossòst an dirigit ua missiva ath prefècte dera Haute-Garonne, en tot sollicitar era dubertura d’aguesta via de manèra urgent entà recuperar era dinamica de cooperacion e vesiatge entre Bossòst e Luchon, qu’an de besonh aguesta connexion entà complementar servicis comerciaus, sanitaris o educatius, entre d’auti

Era sindica d’Aran, Maria Vergés, e er alcalde de Bossòst, Amador Marqués, s’an dirigit ath prefècte dera Haute-Garonne, Étienne Guyot, entà demanar era dubertura deth pas deth Portilhon, barrat eth passat mes de gèr per part der Estat Francés pr’amor d’alèrtes terroristes dirigides ath país vesin.

“Era termièra deth Portilhon ei un pas fòrça important entàs abitants d’Aran e deth parçan de Comminges, e especiaument entàs poblacions de Bossòst e Luchon” afirme era sindica d’Aran, en tot híger que: “andús municipis an de besonh aguesta via entà complementar servicis comerciaus, sanitaris, esportius o educatius, entre d’auti, e ei urgent recuperar era sua dinamica de cooperacion e vesiatge”.

Er alcalde de Bossòst asseguraue que: “hè fòrça temps que, deth Conselh Generau d’Aran e der Ajuntament de Bossòst ençà insistim en besonh de restablir era normalitat transfronterèra en aguest tram, pr’amor qu’en tot atier ar acòrd de Schengen, en marc dera normativa europea, non se pòt estener tant en temps un barrament coma aguest e de forma unilaterau”. En aguest sens, s’a mantengut contacte damb era Delegacion deth Govèrn en Catalunya, e es representants dera Communauté de Communes Pyrénées Haut Garonnaises e era Subprefectura de Saint-Gaudens.

Atau madeish, an trasladat ath prefècte dera Haute-Garonne era sua preocupacion deuant era afectacion que poirie auer er eveniment esportiu Vielha Cycling Tour, qu’aurà lòc eth pròplèu 24 de junhsèga, pr’amor qu’eth sòn recorrut prevé trauessar eth pòrt deth Portilhon. En aguest sens, era sindica d’Aran e er alcalde de Bossòst an demanat ara Prefectura que se permete era realizacion d’aguesta pròva, que compde damb eth supòrt autant deth Conselh Generau d’Aran coma dera Communauté de Communes Pyrénées Haut Garonnaises.