• Per miei d’aguest convèni, eth Conselh Generau se compromet a collaborar damb er Institut e aufrir estades formatives as alumnes d’aguest cicle formatiu, en tot garantir-les un prumèr contacte damb eth mon laborau que pogue èster profitós e didàctic

Era conselhèra de Coneishement deth Conselh Generau d’Aran, Angelina Cases, e era directora der Institut d’Aran, Carmen Roy, an signat aué eth convèni entà desvolopar, en regim d’alternança e damb formacion duau, eth cicle formatiu de grad miei de gestion administrativa en Institut.

Aguest cicle formatiu compde damb ua part practica que se pòt realizar autant ena administracion publica coma en empreses privades deth territòri e, per miei d’aguest convèni, eth govèrn d’Aran se compromet a aufrir estada formativa remunerada a un o ua des alumnes que corsen eth grad miei de gestion administrativa en Aran e collaborar damb eth professorat deth centre entà realizar un seguiment der estudiant pendent es sues practiques de 1000 ores.

“Des deth govèrn deth Conselh Generau d’Aran èm plan satisfèti de poder contribuir ara formacion des estudiants d’aguest grad miei de gestion administrativa e pensam que pòt èster ua grana experiéncia entà auer un prumèr contacte damb eth món laborau e conéisher eth foncionament dera administracion publica”, asseguraue era conselhèra Cases, en tot híger que: “autant er institut coma era rèsta de centres formatius deth nòste territòri pòden compdar damb era nòsta totau collaboracion en toti aqueri aspèctes que siguen ena nòsta man”.