• Aué, eth govèrn aranés e era Fundació ‘La Caixa’ an signat un convèni entà aufrir ajudes economiques a familhes en situacion de vulnerabilitat damb menors ath sòn cargue, en tot destinar aguesta aportacion ara crompa de materiau escolar e a bèques minjador

Era sindica d’Aran, Maria Vergés, e eth director d’Institucions de CaixaBank ena Direccion Territoriau Catalunya, Joaquim Macià, an signat aguest maitin eth convèni entre eth Conselh Generau d’Aran e era Fundació ‘La Caixa’ entara realizacion deth projècte “Ajuda ara poblacion vulnerable d’Aran”.

CaixaBank, a traués d’ua aportacion economica dera Fundació ‘La Caixa’, a mostrat eth sòn supòrt ath programa d’ajudes economiques a familhes damb pògui recorsi qu’agen menors ath sòn cargue, que impulse eth Conselh Generau d’Aran. Eth govèrn aranés a recebut ua collaboracion de 16.000 euròs, qu’anaràn destinadi ara compra de materiau escolar e bèques minjador.

“Entath govèrn deth Conselh Generau d’Aran era atencion as persones, e especiaument as menors, ei un ahèr de vitau importància, per aguest motiu èm fòrça arregraïdi damb era Fundació ‘La Caixa’ e CaixaBank per collaborar damb nosati entà poder dar cobertura a totes aqueres familhes que se trapen en situacion de vulnerabilitat en nòste territòri” manifestaue era sindica d’Aran, en tot híger que: “a traués deth nòste airau de servicis sociaus, trabalham entà previer e lutar contra es factors d’exclusion sociau e facilitar es airines de besonh entà atenuar es situacions de desigualtat, en tot facilitar era coesion sociau, era igualtat d’oportunitats e eth progrès sociau des aranesi e araneses”.

Pera sua part, eth director d’Institucions de Caixabank ena Direccion Territoriau Catalunya, a destacat “era importáncia dera solidaritat e collaboracion entre es diferents entitats e institucions entà protegir as persones en situacion de vulnerabilitat”.