• Eth govèrn deth Conselh Generau d’Aran a presentat aué as Ajuntaments e EMD’s deth territòri es auanci amiadi a tèrme ena estrategia de profitament dera biomassa forestau, un projècte que se començarà a desplegar en 2021 e que supausarà ua clara apòsta pera bioeconomia e eth suenh as bòsqui dera Val d’Aran

Aguest maitin a auut lòc eth Conselh de Bailes dera Val d’Aran, ua amassada presidida peth sindic d’Aran, Francés Boya, e a on s’a compdat damb era preséncia (autant de forma presenciau coma telematica) des conselhèrs e conselhères d’Aran e alcaldes e alcaldesses deth territòri, e i an participat tanben eth degà deth Collègi d’Enginhaires Forestaus, Eduardo Rojas, eth coordinador de politica forestau deth Pirenèu, Paco Cano, e er advocat e silvicultor, Alex Serrahima.

“Era estrategia forestau ena que trabalham a coma principau objectiu amiar a tèrme un profitament sostenible des nòsti bòsqui, en tot apostar pera bioeconomia e era reinversion enes infraestructures de montanha”, afirme eth sindic d’Aran, en tot híger que: “des deth govèrn deth Conselh Generau d’Aran trabalham entà pactar un modèl de governança forestau basat en un acòrd institucionau damb es ajuntaments e EMD’s entà hèr-mos cargue des milèrs de tones de husta disponibles cada an enes nòsti parçans e que mos cau profitar entà melhorar, per ua part, era nòsta qualitat ambientau e, per ua auta, era economia deth territòri, pr’amor qu’ei un recors pròpri que sonque mos cau saber emplegar”.

Ei previst qu’aguest mecanisme de gestion forestau comence a foncionar en aguest pròplèu an 2021 pr’amor qu’ena actualitat, es recorsi forestaus dera Val d’Aran son fòrça infrautilizadi e, de hèt, Aran ei eth territòri deth Pirenèu catalan damb menor grad de profitament deth creishement. Laguens d’aguest projècte ei contemplat tanben qu’en brèu se pogue installar ua caudèra de biomassa en Espitau Val d’Aran.

“Recuperar era gestion forestau ei clau entà arténher uns bòsqui mès resilents ath cambi climatic e as incendis forestaus, ath temps que podem generar ua economia verda ath torn des nòstes montanhes”, a manifestat eth sindic d’Aran.

Damb era creacion d’aguest nau mecanisme de gestion forestau se preten profitar eth potenciau des bòsqui aranesi e favorir era economia des ajuntaments aranesi, ath còp que s’apòste per ua energia mès neta e sostenible gràcies ath profitament dera biomassa.