Carlos Barrera, sindic d’Aran, a signat un convèni de patrocini damb es esportistes professionaus aranesi: Álex Puente, Ruben Caseny, Aymar Navarro e Tòn Cónsul, entà pr’amor de promòir era destinacion toristica esportiua Val d’Aran peth mon, representada ena imatge e enes valors des corredors, des espòrts que practiquen e des equips des que formen part, mejançant eth patrocini institucionau.

Damb aguest convèni de patrocini, es esportistes aranesi enes desplaçaments e “stages” auràn de portar enes equipaments e ròbes de descans es logotips de Foment Torisme Val d’Aran “Val d’Aran era esséncia des Pirèneus” e Conselh Generau d’Aran, ath delà de portar-les ena ròba de competicion, cada viatge qu’era nòrma e eth reglament des equips ac permeten.

Enes ròdes de premsa, eveniments jornalistics o esportius mediatics, portaràn eth logotip “Val d’Aran era esséncia des Pirèneus” e Conselh Generau d’Aran, atau coma es veïculs qu’utilizen es esportistes entàs desplaçaments e assisténcies as competicions, auràn de portar eth madeish logotip.

Tanben distribuiràn publicitat oficiau creada per Foment Torisme Val d’Aran dera destinacion toristica e esportiua Val d’Aran enes concentracions, competicions e eveniments esportius e/o sociaus restacadi damb es equips.

Álex Puente

Álex Puente, ei esquiador professionau FIS (categoria internacionau), corredor Olimpic (Sochi 2014) d’esquí aupin e membre der equip Steffen-S1, çò que li permet participar en pròves nacionaus e internacionaus de prumèr nivèu peth mon.

“Ei ua ajuda fòrça important, a mès d’un aunor representar ath mèn país, Aran, a on i vage a competir” a soslinhat Puente qu’a hijut “era participacion en es JJOO de Sochi a estat ua experiéncia inolvidable, mès encara me queden fòrça reptes que complir coma ei eth mondiau junior.”

Ruben Caseny

Ruben Caseny, ei ciclista damb licéncia e corredor d’esquí nòrdic professionau, membre der equip UCI Start-Trigon Cycling de categoria Continental UCI e der equip Vitaldent-Aran, çò que li permet participar en pròves nacionaus e internacionaus de prumèr nivèu peth mon, tant de ciclisme coma d’esquí nòrdic.

“Ei ua grana motivacion que t’ajuden entà tirar entà deuant, pr’amor que tot some. Me senti fòrça orgulhós qu’eth mèn país me dongue supòrt e ath madeish viatge poder representar-lo” a manifestat Caseny pendent era signatura.

Aymar Navarro

Aymar Navarro, esquiador professionau “freeride” de categoria internacionau World Freeride Tour (WFT/WFQ) çò que li permet tanben participar en pròves nacionaus e internacionaus de prumèr nivèu peth mon, a soslinhat “era Val d’Aran ei un paradís entà practicar quinsevolh espòrt que, mès en especiau entàs practicants coma jo, deth “freeride”, non te l’acabes”.

Ath delà, Navarro a ahijut “ei un orgulh representar ara Val d’Aran e, que melhor que representar e que t’ajuden.”

Tòn Cónsul

Tòn Cónsul, ei patinador professionau junior ISU e membre deth FCB, çò que li permet participar en pròves nacionaus e internacionaus de prumèr nivèu peth mon, de patinatge artistic sus gèu.

En paraules de Tòn, “representar ath mèn petit país, era Val d’Aran, ei tot un orgulh entà jo, açò encara te da mès fòrces entà contunhar lutant.”

Pera sua part, eth sindic d’Aran, Carlos Barrera, a soslinhat “qui melhor qu’es nòsti joeni esportistes professionaus aranesi entà representar eth nòste país e eth sentiment d’identitat. Eth govèrn aranés vò ajudar eth sòn esfòrç entà obtier mès e melhors resultats.”

En paraules dera conselhèra de Torisme d’Aran, Anna Díaz “Foment Torisme Val d’Aran facilitarà as patrocinadi eth materiau publicitari consistent en originaus deth logotip “Val d’Aran era esséncia des Pirèneus” en diferenti idiòmes e deth Conselh Generau d’Aran, atau coma materiau publicitari diptics, triptics, revistes, eca” e a hijut “ena Val d’Aran eth torisme e er espòrt van dera man e ei un orgulh qu’es nòsti esportistes ath delà de competir en mès naut nivèu poguen dar a conéisher era nòsta destinacion toristica”.

Eth Conselh Generau d’Aran pagarà, en concèpte de patrocini, era quantitat de 3.000€, a cadun des quate esportistes aranesi.

Ara signatura deth patrocini tanben a assistit eth vicesindic d’Aran e conselhèr d’Espòrts, Luís Carlos Medina, eth conselhèr de Joenessa, Marcos Viló, e familhars des joeni esportistes.