Vielha, 23 de hereuèr de 2018.- Eth Govèrn d’Aran a encargat ar arquitècte e director dera School of Architecture dera UIC (Universitat Internacionau de Catalonha) de Barcelona, Josep Lluis i Ginovart, era redaccion deth projècte executiu d’accessibilitat ath campanau dera glèisa de San Andrèu de Salardú. Eth Conselh Generau d’Aran destine 12.480 € ara redaccion d’aguest projècte arquitectonic qu’a de perméter era recuperacion der accès e reforma deth campanau entà qué en un futur sigue visitable. Aguesta accion deth Conselh Generau arrespon a dus objectius, era recuperacion e manteniment der auviatge dera Val d’Aran e qu’aguest se convertisque en un nau atractiu toristic restacat ara istòria deth país.

Eth Conselh Generau d’Aran ja a amiat a tèrme d’autes accions d’aguestes caracteristiques coma en cas dera recuperacion deth campanau dera glèisa de San Félix de Vilac.

Eth Dr. Josep Lluis i Ginovart, ei arquitècte pera ETSAB dera UPC (1982) e Doctor arquitècte pera ETSARQ dera UIC (2002). Actuauments des de 2016 ei professor titular e Director dera School of Architecture dera Universitat Internacionau de Catalonha, UIC de Barcelona. A estat Director deth Departament d’Arquitectura dera Universitat Rovira Virgili (2014-2016). Ei investigador actiu, e dirigic coma IP eth Grop d’Investigacion coneishut Architectural Heritage (PATRIARQ). Actuauments ei deuant dera prumèra Cátedra de Catalonha d’Intervencion en Auviatge Arquitectonic.

Era glèisa de San Andrèu de Salardú lutz un estil arquitectonic exterior pròpri deth romanic tardièr deth sègle XIII, era planta ei de tipe basilicau, damb eth cap de tres absides e portada exempte d’audidor. En angle sud-oèst i a adorsada ua tor campanau deth sègle XV que conserve ena planta baisha un espaci abitable estructurat en copòla e nervadures.

Ath laguens manten ua eleganta estructura arquitectonica gotica sostenguda sus pilars de basa cairada e vòltes de crosilha. Damb ua des pentures muraus mès vastes e conservades dera Val d’Aran, deth sègle XVII. En absida centrau, se tròbe erigida era talha en majestat de Crist de Salardú, deth sègle XII, òbra mèstra deth talhèr d’Erill la Vall.