Eth 6 d’abriu se celèbre eth Dia Mondiau dera Activitat Fisica (DMAF), ua jornada impulsada a nivèu globau entà conscienciar sus era importància de mantier-se actius entara salut e eth benèster. Des deth Conselh Generau d’Aran, animam a tota era ciutadania, es municipis, es clubs esportius, es entitats e es institucions dera Val d’Aran a higer-se ad aguesta iniciativa, en tot impulsar e difóner accions que fomenten un estil de vida a trauès der espòrt e era activitat fisica. 

Un compromís collectiu per ua Val d’Aran mès activa 

Eth Conselh Generau d’Aran, en collaboracion damb Servicis Assistenciaus Integrats d’Aran, a lançat ua campanha entà promòir era activitat fisica coma element clau entara prevencion de malauties e era melhora dera qualitat de vida.

Des deth govèrn aranés convidam as Ajuntaments, centres esportius, clubs e entitats dera Val d’Aran a organizar e difóner activitats adreçades a tota era poblacion, atau coma a difóner messatges de sensibilizacion sus es beneficis d’èster actius.

Participa e compartís eth tòn espòrt! 

Era ciutadania tanben pòt participar en aguesta jornada en tot compartir enes sòns hilats sociaus imatges e videos dera sua activitat esportiva deth dia damb eth hashtag #DMAF2025. Er objectiu d’aguesta iniciativa ei difóner eth messatge e conscienciar sus era importància deth moviment coma part d’un estil de vida san.  

Activitats e collaboracions 

Animam a toti a participar en aguesta celebracion e a convertir eth 6 d’abriu en ua jornada entà impulsar era activitat fisica en tota era Val d’Aran!

📅 6 d’abriu de 2025
📍 Viu era activitat fisica en Aran!
📲 Compartís era tua practica esportiva damb eth hashtag #DMAF2025

Vielha, 1 d’abriu de 2025