• Aguesti trabalhs serviràn entà condicionar eth tram dera pista de Varradòs que va de Bagergue ath Saut deth Pish, ua via que se trape en un estat fòrça maumès pr’amor dera erosion der aigua e era nhèu

Eth Conselh Generau d’Aran inície aué eth sòn projècte de melhores e manteniment de camins ena Val d’Aran, un projècte dotat d’un pressupòst de 150.000 euròs, e damb eth quau s’adequarà eth tram dera Pista de Varradòs entre era Bòrda des de Perú (Bagergue) e eth Pònt de Varradòs ath Saut deth Pish, un tram que compde damb un totau de 14,2 km.

Era actuacion en aguesta pista ère fòrça de besonh pr’amor que se tracte d’un camin d’accès a un punt de gran interés naturau e toristic coma ei eth Saut deth Pish e qu’enquiara se trapaue en un estat fòrça maumès pr’amor dera erosion dera nhèu e er aigua.

“Eth Saut deth Pish compde damb un accès per Pònt d’Arròs fòrça massificat pendent es mesi d’ostiu mès, damb aguesti trabalhs, se demore poder dar ua naua entrada ad aguesta zòna des dera poblacion de Bagergue, en tot daurir atau ua via de comunicacion entre aguesta poblacion e eth pòble d’Arròs”, explicaue eth conselhèr de Territòri, Paisatge e Gestion Ambientau, Francés Bruna, en tot híger que: “daurir aguesta via pòt èster beneficiós entath nuclèu de Bagergue, que compde sonque damb ua carretèra d’accès, pr’amor qu’en cas d’amiar a tèrme trabalhs ena aguesta carretèra, poiràn compdar damb ua dusau gessuda entà tot tipe de veïculs”.

Aguesta actuacion a estat subvencionada peth Departament de Vicepresidència i Polítiques Digitals i Territori dera Generalitat de Catalunya, laguens dera linha d’actuacions de melhora e manteniment de camins der hilat vesiau e rurau enes comarques de montanha e en Aran 2021.