• Eth govèrn d’Aran cerque conéisher es besonhs reaus des collectius as que se dirigís era enquesta e establir, de manèra consensuada damb era ciutadania, es accions a préner enes pròplèu ans en encastres coma era salut, eth léser, eth trabalh, era igualtat o er abitatge, entre d’auti

Eth Conselh Generau d’Aran lance ua enquesta dirigida ara joenessa d’entre 16 e 35 ans e entàs hemnes majors de 16 ans que viuen, trabalhen o an neishut ena Val d’Aran.

“Er objectiu d’aguesta enquesta ei conéisher era situacion reau d’aguesti dus collectius en nòsti territòri entà poder establir es accions a préner enes pròplèu ans en encastres coma era salut, er abitatge, eth trabalh, eth léser, era igualtat o er espòrt, entre d’auti” explicaue era sindica d’Aran, Maria Vergés, en tot híger que: “entath govèrn deth Conselh Generau d’Aran ei imprescindible compdar damb era participacion dera ciutadania entà arténher un país damb mès probabilitats, mès divers e mès igualitari en futur”. Per aguest motiu, era sindica demanaue “era maxima participacion possible en aguesta enquesta, entà auer atau ua imatge mès reau dera sua situacion”.

Aguesta enquesta, que serà dubèrta pendent es mesi de junh, junhsèga e agost, ei totaument anonima e es responses seràn analizades per ua consultoria extèrna. Ath delà, es persones que responen pòden, de forma voluntària, participar en sorteig de diuèrsi lòts de productes e activitats deth territòri.

Pendent es dies 7 e 10 de junhsèga se desplaçaràn enquiara Val d’Aran diuèrsi professionaus dera consultoria Xarxa Consultors entà amiar a tèrme aguestes enquestes de forma presenciau enes punts de major afluéncia e enes pòbles damb mès poblacion. Ath delà, se demanarà tanben supòrt as ens locaus, institucions e associacions d’Aran entà hèr difusion e arribat atau a mès persones.

Se tu tanben as entre 16 e 35 ans, o es ua hemna de mès de 16 ans, pòs participar a trauès d’aguest ligam: https://xarxaconsultors.typeform.com/to/aD1wX58S