• Aguesta lacra sociau a deishat, en çò que va d’an, ua cinquantia d’hemnes assassinades a mans des sues parelhes o ex parelhes en Espanha e era Val d’Aran non ei pas aliena ad aguesta grèu problematica

• “Tath govèrn d’Aran aguest ahèr ei de vitau importància e, per aquerò, vam a amiar a tèrme tota ua sèrie d’accions en matèria de formacion, prevencion e de coordinacion damb toti es estaments que trabalhen tà erradicar era violéncia de genre ena nòsta societat”, afirme era vicesindica d’Aran, Maria Vergés

Eth deluns, 25 de noveme, se celèbre eth Dia Internacionau còntra era Violéncia de Genre. Ua lacra sociau que, sonque en çò que va d’an, a deishat dejà ua cinquantia d’hemnes assassinades a mans des sues parelhes o ex parelhes en Espanha.

Era Val d’Aran non ei aliena ad aguesta lacra e pr’amor d’açò eth Conselh Generau d’Aran, a trauès deth Servici d’Informacion e Atencion ara Hemna (SIAH), a organizat ua jornada commemoratiua damb era intencion de mostrar eth sòn compromís damb era luta pera igualtat e era erradicacion dera violéncia de genre.

A compdar des 19 ores deth 25 de noveme, s’amiarà a tèrme era presentacion “Era violéncia de genre en Aran”, a cargue des professionaus deth SIAH damb era prèvia dubertura dera vicesindica d’Aran, Maria Vergés. Ara seguida, se projectarà eth vidèo commemoratiu deth Conselh entath 25-N, se presentarà eth pannèu dessenhat en Centre de Joenessa Antara, der Ajuntament de Vielha e Mijaran e, fin finau, se procedirà ara lectura deth manifèst a cargue deth SIAH e des membres dera Associacion pera Igualtat en Aran.

“Tath govèrn d’Aran aguest ahèr ei de vitau importància e, per aquerò, vam a amiar a tèrme tota ua sèrie d’accions en matèria de formacion, prevencion e de coordinacion damb toti es estaments que trabalhen tà erradicar era violéncia de genre ena nòsta societat”, afirme era vicesindica d’Aran.