KIVa ei un programa contra eth sètge escolar desvolopat pera Universitat de Turku (Finlàndia)

Vielha, 23 de noveme de 2018.- Eth Conselh Generau d’Aran a prepausat enes escòles dera Val d’Aran e en IES d’Aran adaptar as centres eth programa KIVa desvolopat pera Universitat de Turku en Finlàndia e impulsat peth ministèri d’Educacion e Cultura d’aguest país contra eth sètge escolar.

Era conselhèra de Salut e Benestar d’Aran, Anna Díaz, a explicat qu’es escòles dera Val d’Aran e er IES d’Aran, ja trabalhen ena deteccion de possibles casi de sètge escolar mejançant era collaboracion e es protocòus establidi damb eth departament d’Ensenhament dera Generalitat de Catalonha. Totun, Anna Díaz, a manifestat qu’era adaptacion deth programa KIVa enes centres educatius d’Aran permeterà trabalhar damb un sistèma integrau a trauès d’accions globaus adreçades a tota era comunitat educativa, ei per açò, a dit, que “convidi as centres educatius deth país a implementar-lo”.

Eth sètge escolar ei un comportament o tracte perjudiciau e degradant deth mainatge o mainada que viòle eth sòn dret arreconeishut a gaudir d’un entorn escolar liure de violéncia. Un comportament qu’ei deliberat, repetitiu e adreçat a ua persona relatiuaments indefensa. Se calcule qu’un 10% de mainatges e mainades en tot eth mon patís bullying, maugrat qu’er informe Cisneros (Estudi realizat a 25.000 mainatges e mainades de tota Espanha, entre 8 e 18 ans) assegure qu’eth numerò s’elève enquiath 23%.

Eth sètge escolar ei mès fisic en cas des mainatges, e mès psicologic en des mainades, maugrat que tanben pòt èster verbau e per internet. Es conseqüéncies deth bullying pòden èster: ànsia, depression, solitud, baisha autoestima o baish rendiment escolar. Ena majoria des casi tostemp i a un espectador o un grop d’observaires (qué ei çò qu’a de besonh er assetjador) que son part deth problèma, mès tanben dera solucion. Cau arrebrembar mès que tant assetjadi coma assetjadors son victimes deth bullying.

Eth programa KIVa abòrde eth sètge escolar damb er objectiu d’educar e sensibilizar a tota era comunitat educativa sus es diferenti tipes de bullying e coma detectar-les, en tot formar as ensenhaires a trauès d’estrategies, metodologies e estruments practics entà previer, detectar e hèr eth seguiment des casi de sètge. En tot ajudar as mainatges e mainades a desvolopar era sua intelligéncia emocionau en tot refortilhar eth sòn sistèma de valors entà lutar contra eth sètge. En tot aufrir as pairs e mairs informacion sus eth bullying a trauès de diferentes pautes que les permeten identificar-lo e en tot mantier un papèr clau ena comunicacion entre era escòla e casa.

Eth programa KIVa establís ua durada minima de tres ans enes centres educatius entà obtier era maximala efectivitat e reduir dràsticament es casi detectadi.

Eth programa s’a implantat en 90% des escòles finlandeses, e s’a adaptat tanben es païsi coma Soïssa, Olanda, Reialme Unit, Alemanha, França, Belgica, Itàlia, Luxemborg e Suècia. En cas deth País Basc es casi de sètge s’an redusit un 41% a compdar deth prumèr an d’implantacion.

Eth Govèrn d’Aran a previst destinar 24.000 € ad aquesiment deth programa KIVa e cedir-lo as centres entara sua implantacion.