• Pendent tot eth mes d’octobre, eth govèrn deth Conselh Generau, a trauès de Foment Torisme Val d’Aran, a organizat un ampli ventalh d’activitats entà gaudir dera tardor ena Val d’Aran en tot conéisher era sua gastronomia, cultura e miei naturau

Eth govèrn deth Conselh Generau d’Aran, a trauès de Foment Torisme Val d’Aran e damb era collaboracion de diferents empreses e restaurants deth territòri, a premanit entad aguest mes d’octobre ua complèta e variada prepausa d’activitats entà gaudir dera tardor, que convertís era Val d’Aran ena tèrra des mil colors.

“Era tardor ei ua sason damb moltes possibilitats, non sonque pr’amor que mos aufrís uns paisatges espectaculars, senon tanben perque era meteorologia encara permet gaudir d’activitats coma eth senderisme o eth ciclisme pendent uns mesi mès”, afirme eth conselhèr d’Economia, Torisme e Promocion Economica, Juan Antonio Serrano, en tot híger que: “mos cau profitar es recorsi qu’aufrís Aran pendent aguesti mesi de tardor, enes qu’abituaument non recebem un elevat nombre de visites, e pensam qu’aguesta ei ua bona campanha entà diversificar era nòsta aufèrta toristica e atrèir a mès persones”.

Pera sua part, eth tanben conselhèr d’Economia, Torisme e Promocion Economica, Josep Canut, destaque que: “des deth govèrn deth Conselh Generau d’Aran auem trabalhat damb diferents empreses deth territòri entà aufrir tot tipe d’activitats, coma gessudes entà víuer era brama deth cèrvi o passejades peth bòsc damb expèrts micologics entà conéisher mès sus eth mon des misharnons, entre fòrça d’autes” e hig: “ath delà, diferents restaurants aranesi an premanit menús especiaus centradi enes productes de tardor que se poiràn degustar pendent totes es dimenjades deth mes”.

Pendent era tardor, era explosion cromatica que se produsís enes bòsqui d’Aran convertís eth territòri en un endret magic entà passar uns dies gaudint dera montanha e des activitats organizades, que permeteran gaudir d’ua aventura unica.