• Ena amassada telematica celebrada aguest maitin, ena qu’an participat ath torn de 50 persones, s’a explicat en què consistís aguest projècte, que supause ua oportunitat entà replantejar era gestion territoriau e trabalhar ena diversificacion economica dera Val d’Aran, en tot centrar-se en valors coma era sostenibilitat e era innovacion

Aguest maitin a auut lòc, telematicament, era jornada publica de presentacion deth projècte de candidatura dera Val d’Aran coma Resèrva dera Biosfèra dera UNESCO e era posterior amassada damb es agents socioeconomics deth territòri entà definir es organs de governança d’aguesta Resèrva.

Era jornada de presentacion dera candidatura a estat presentada peth sindic d’Aran, Francés Boya, e s’ha compdat damb era intervencion deth doctor Martí Boada, era directora dera Resèrva dera Biosfèra de Menorca, Irene Estaún, e es tecnics des empreses responsables dera redaccion dera candidatura, eth doctor Carles M. Gasol (Inèdit), Xavier Hidalgo (Inèdit) e Sara Arjó (Verd e Blu).

“Aguest ei un projècte que mos permet replantejar era gestion territoriau dera Val d’Aran e trabalhar en ua diversificacion economica cada còp mès de besonh entath territòri e qu’a d’èster fonamentada enes que volem que siguen dus des pilars essenciaus deth futur d’Aran: era sostenibilitat e era innovacion”, afirmaue eth sindic d’Aran, en tot híger que: “eth reconeishement coma Resèrva dera Biosfèra non mos permeterà sonque méter en valor eth nòste auviatge naturau, senon que mos dotarà d’un esturment entà valorizar era nòsta cultura e era nòsta lengua, en tot hèr perdurable e suenhant eth nòste auviatge culturau”.

Pendent aguesta jornada publica de presentacion dera candidatura, ena qu’an participat ath torn d’ua cinquantia de representants dera societat civiu, empreses e administracion, s’a informat as participants qu’eth govèrn aranés se trape ara en ua fasa de redaccion dera candidatura a on se cerque era maxima implicacion deth territòri. De hèt, s’a artenhut dejà era implicacion activa d’un elevat nombre d’ajuntaments, EMD’s, entitats e empreses que ven aguest reconeishement internacionau coma ua oportunitat de plaçar Aran coma un territòri comprometut damb eth sòn entorn e era sua identitat.

Era figura dera Resèrva dera Biosfèra supausarie entara Val d’Aran non pas un element limitador, senon de dinamizacion territoriau, atau e coma a explicat era directora dera Resèrva dera Biosfèra de Menorca. En tot seguir es Objectius de Desvolopament Sostenible es quaus determine era figura dera Resèrva dera Biosfèra, se darie supòrt as iniciatives damb valors coma era sostenibilitat, era eficiéncia e era participacion, entre d’autes, e sorgirien naui projèctes destinadi a hèr d’Aran un territòri comprometut damb eth sòn auviatge naturau, culturau e sociau.

Era dusau part d’aguesta jornada, ena qu’an participat es actors socioeconomics deth territòri, tecnics deth Conselh e Ajuntaments e pedanies, s’a centrat ena prepausa e definicion dera estructura de governança dera Resèrva dera Biosfèra dera Val d’Aran. Enes pròplèu dies se comunicarà es resultats dera session d’aué e se contunharà damb eth procès participatiu.