• Era creacion d’ua naua plaça de traumatologia e de dues en atencion primària, atau coma era cubertura d’ua plaça d’anestesiologia e ua de cirurgia que demorauen vacantes, respon as besonhs actuaus dera ciutadania aranesa e ar objectiu de mantier e potenciar era atencion sanitària non relacionada damb eth COVID-19

Aguest mes de seteme s’an incorporat ar Espitau Val d’Aran naui professionaus enes especialitats de traumatologia, anestesiologia e cirurgia, atau coma en atencion primària dempús des pròves selectives que convoquèren en mes de junhsèga.

Per çò que hè ar airau de traumatologia, s’a creat ua naua plaça entà curbir es besonhs que presente era Val d’Aran en aguesta especialitat. Atau donc, damb aguesta incoroporacion, se compde damb tres mètges especialistes en traumatologia entà dar servici en espitau aranés.

Atau madeish, er airau d’anestesiologia compdaue damb ua plaça vacanta, des dues existentes, qu’enquiath moment se curbie per periòdes cuerti e damb fòrça dificultats e a compdar d’ara er Espitau Val d’Aran aurà dus mètges especialistes en anestesiologia. En aguest sens, tanben s’a cubèrt era plaça de cirurgia que demoraue vacanta enes darrères setmanes, e se n’an creat dues naues en atencion primària que responen ara incorporacion des acòrds der ICS damb eth Sindicat de Metges de Catalunya.

Entà Maria Vergés, conselhèra d’Igualtat, Salut e Benèster, “damb aguestes contractacions procuram consolidar quauques des especialitats medicaus mès importantes tath nòste territòri, atau e coma hérem temps endarrèr damb era especialitat de ginecologia, conscients de qu’era manca de professionaus especialistes ei un des principaus problèmes deth nòste sistèma sanitari” e higie que “a despièch deth COVID-19, e d’acòrd damb eth critèri des professionaus sanitaris, eth nòste interès ei reforçar era atencion medicau que non a relacion damb eth COVID-19 e qu’enes darrèri mesi s’a vist condicionada pera luta contra eth virus”.