Vielha, 5 d’abriu de 2019.- Eth Govèrn d’Aran abilitarà un tresau tren toristic pendent eth mes d’agost ena ribèra dera Artiga de Lin entà facilitar es visites toristiques e escuerçar es tempsi de demora des usatgèrs enes ores centraus deth dia en aguest lòc unic dera Val d’Aran.
Eth Conselh Generau d’Aran destinarà 60.000 € ar increment deth servici damb eth tresau tren toristic d’accès ena Artiga de Lin.
Eth servici de tren toristic dera Artiga de Lin comencèc a foncionar damb ua pròva pilòt en an 2016 e en 2017 eth plen deth Conselh Generau d’Aran aprovèc era regulacion definitiva d’accès motorizat ena ribèra dera Artiga de Lin (era pista que junh era poblacion d’Es Bòrdes e eth Plan dera Artiga).
Era regulacion der accès motorizat ara ribèra deth Joèu compòrte qu’es darrèri 3 km dera pista dera Artiga de Lin, siguen reguladi. Es veïculs que non dispòsen d’autorizacion d’accès motorizat an d’estacionar ena zòna de parcatge plaçat just abans dera ermita dera Artiga de Lin, un espaci a on ei installada ua caseta d’informacion entàs visitants.
Eth servici de tren toristic foncionarà aguest estiu des deth 19 de junhsèga enquiath 8 de seteme e eth prètz deth servici serà de 2 èuros per viatge en cas des adults e d’un èuro entà mainatges d’edats comprenudes entre es 3 e es 12 ans. Entàs menors de 3 ans eth trajècte ei gratuït. Er orari de regulacion ei de 9 ores deth maitin a 18 ores. Es taxis deth país an liure accès ena Artiga de Lin, atau coma eth rèste de vesins e vesies dera Val d’Aran que paguen er impòst de circulacion des sòns veïculs enes ajuntaments dera Val d’Aran.
Er estiu darrèr mès de 17.000 persones utilizèren eth tren toristic en tot evitar qu’uns 8.500 veïculs passèssen per aguest tram de pista.
Era visita ara ribèra dera Artiga de Lin aufrís era possibilitat de conéisher eth Centre d’Interpretacion dera Artiga de Lin que hè un recorregut per desparièrs àmbits dera zòna des des glaciaciones que modelèren era ribèra dera Artiga hè 50.000 ans. Eth Centre aufrís ar usatgèr ua visita interactiva qu’utilize er audiovisuau e es naues tecnologies entà transméter toti es detalhs dera visita.
Era conselhèra de Torisme d’Aran, Anna Díaz, expliquèc qu’aguest renfortiment deth tren toristic pendent eth mes d’agost permeterà qu’es visitants dera ribèra dera Artiga de Lin poguen profitar fòrça mès es sues visites en tot escuerçar eth temps de demora entà accedir ath servici de transpòrt. En aguest sens, Anna Díaz, arrebrembèc qu’enes darrèri ans eth Govèrn d’Aran a amiat a tèrme desparièrs projèctes en aguest bèl paratge aranés coma son es sendèrs dera Aigua, era recuperacion deth tram entre eth Camin de Soberado e eth guardader dera aigua; eth nau Refugi dera Artiga de Lin; era installacion d’un cable d’acièr pera part de Còth deth Hòro entà garantir ua major seguretat tas usatgèrs que decidissen utilizar era rota aranesa der Aneto a trauès deth Còth deth Hòro e pas des aranesi ; era connexion damb eth Hospice de França; era abilitacion dera zòna de parcatge e era Ermita dera Artiga de Lin; ath delà deth Centre d’Interpretacion e eth tren toristic.
