Vielha, 4 de gèr de 2019.- Eth Govèrn d’Aran a renauit eth contracte damb era enterpresa qu’edite era revista infantila “Era Garbèra” entàs escòles dera Val d’Aran.

Era Garbèra ei ua revista infantila d’origina valenciana publicada pera editoriau Camacuc des der an 1984, que des der an 2000 a era sua version en aranés. Era publicacion ei presenta en collègis, instituts e bibliotèques, e foncione a trauès de suscripcion e de forma bimensuau. Ath delà de comics, era revista tanben includís notícies e seccions de tèxte, condes e passatemps.

Eth Conselh Generau d’Aran a trauès deth Departament de Cultura e Politica Lingüistica destine 8.500 € entara suscripción dera revista que s’includís laguens deth projècte educatiu entàs escòles dera Val d’Aran.

Era revista Era Garbèra se some a d’autes publicacions entà mainatges e mainades impulsades peth Conselh Generau d’Aran coma era colleccion de condes en aranés “Petit País” que da responsa a un besonh manifestat pes membres dera comunitat educativa des escòles dera Val d’Aran, amassa damb eth Centre de Recorsi Pedagogics e eth servici de Cultura e Politica Lingüistica deth Conselh Generau d’Aran, entà crear, elaborar e adaptar materiau didactic e produccions literàries en aranés entà mainatges e mainades d’educacion infantila e de cicle iniciau.

E era revista setmanau en format digitau “Eth Tricicle”, entà trabalhar notícies d’actualitat damb es alumnes des escòles de Les, Bossòst, Vielha e ZER Val d’Aran, qu’era arrevirada ar aranés cor a cargue deth Departament de Cultura e Politica Lingüistica deth Conselh Generau d’Aran.

Eth sindic d’Aran, Carlos Barrera, soslinhèc que d’aguesta manèra eth Govèrn d’Aran da tostemp eth sòn supòrt as iniciatiues dera comunitat educativa dera Val d’Aran e a tot aquerò que servisque entà melhorar er accès des mainatges e mainades araneses ara nòsta lengua, cultura e tradicions, atau coma er emplec sociau der aranés en contorn que sigue, e ena escòla en particulara.